上星期有銀行客戶經理（Relationship Manager，簡稱RM）來電話：「左先生，我係XYZ，你嘅RM，大家未見過，你有時間到銀行見吓面，好唔好？」現在RM有好多係女士，呢位女士好有禮貌，唔見，似乎拒人千里之外，畢竟咁多年來，邊個係自己嘅RM都唔記得晒咯，去見一次都OK啦，否則一有甚麼事情，畀銀行閂咗個戶口，要開番一個都幾麻煩。自從有咗KYC、AML之後，只有客戶怕銀行閂戶口，銀行唔會怕客戶走人，呢樣情況，比較左丁山40年前做銀行貸款主任嘅情況，大大不同。
上到銀行，原來RM係年青小姐，左丁山老實不客氣，問佢做咗幾多年，話做咗七年，再問佢在大學讀邊科，RM笑：「我係恒商副學士，讀市場學。」咦，梗係醒目女嘞，讀恒商而又只係副學士，七年間就做到RM，有房間，有助手，說不定三十年之後，會係另一個梁高。恒商教學，相信有一套辦法。
言歸正傳，講到最尾係想左丁山郁吓戶口，買番啲產品，左丁山問有冇高息債券基金可以諗吓，RM嚇咗一跳：「左先生，以你年紀，我地只可以賣啲最穩陣，最高收益少過三厘嘅基金畀你，你嘅risk level唔可以高過第三級。」兩三厘收益嘅基金買嚟做乜，目前通脹都3.3%啦，不如買領展仲簡單，於是為辯論而辯論，講咗一輪投資原則，後生女RM一路笑容滿面，恐怕心裏一定係諗：「呢個老人家真難搞！」，不准長者買高風險投資，自不然係雷曼風暴後遺症，金管局一刀切，當個個長者都係投資盲，唔准佢地買乜買物，銀行當然要跟從金管局指引，做足合規程序，是故上次左丁山在另一銀行將定期澳元存款換成港元存款，都要聽錄音答問近十分鐘，煩死人。今天銀行經營成本上升，與雷曼風暴有莫大關係。當年客戶要左丁山將澳元存款換回港元，講一分鐘電話就得，依家要搞起碼半小時，單位交易成本有乜辦法唔上升。
RM向左丁山推銷低風險低收益產品不成，左丁山反問佢是否可以開個海外戶口。RM即刻答：「得呀，近期好多客戶要開海外戶口，唔係倫敦就係新加坡，尤其以後者最多，開咗之後可以隨時轉錢過去！」係囉，林鄭月娥係最大推手，佢講一聲「玉石俱焚」，大把人即時要部署。近日佢放風會考慮參考所有法例可能性，包括緊急法例，刺激到左丁山啲中環老友跳起，互相追問：「你開咗新加坡／倫敦／三藩市戶口未？」緊急法例唔講得笑，有事政府可以充公財產，鬼都怕，如果真係推出緊急法例，林鄭就係同香港中產／富翁攬炒，投下自殺炸彈，有積蓄人家豈可不防。