黃淑儀兒子徐肇平因為愛演戲才加入娛樂圈，14年加入無綫在明珠台做主持，他根本志不在此，16年離巢。徐肇平不想錯過機會，過檔ViuTV即獲派拍劇集。對於外間指他拒絕簽約做「親生仔」很可惜，徐肇平並不認同：「我唔係想做大明星，唔係成日想曝光自己嗰啲，我只係想做演員。」他很滿意現在擁有的演戲機會，所以不後悔。
現年31歲徐肇平加入娛樂圈不是為追逐名利，他只想演好戲，不過放棄簽約，即被無綫列入黑名單，他慶幸獲ViuTV賞識，過檔接拍劇集《娛樂風雲》，其間他多次感恩電視台給予的機會：「我好好彩，有Viu畀機會我。」
「簽咁多年做乜」
雖然被無綫雪藏事件已隔多年，徐肇平表示已忘記詳細情況：「記得當日係做舞台劇，我化緊妝，聽到媽咪喺訪問入面講，我都知道講出嚟會影響好多嘢，我記得當時有啲監製想用我，最後都抽起咗。雖然我嗰時喺明珠台都學到好多嘢，但係我真係想拍劇，如果要我喺明珠台做主持，我真係冇乜興趣，簽咁多年做乜呢？」
問到可覺娛樂圈黑暗？徐肇平坦言：「我冇嬲，好彩我冇簽management，仲可以出去做其他嘢。」當年拒絕簽約做「親生仔」，無綫依然多番向他游說：「有人同我講，你唔簽TVB冇嘢做，我就問自己點解要做呢行呢？我唔係想做大明星，唔係成日想曝光自己嗰啲，我只係想做演員，唔係話Ig有幾百萬followers就代表啲乜，我只係想做𠵱家做緊嘅嘢，我一啲都冇後悔。」
少問母親意見
徐肇平在新劇中與ERROR成員何啟華有不少對手戲，徐肇平說：「對住佢，我成日忍唔住笑，有時佢又會爆肚玩吓，我好鍾意。因為自己中文唔好，所以我係會跟對白嘅人，不過喺現場排嗰陣，互相爆肚撞啲新嘢，好好玩。」他謂不會刻意叫媽咪捧場：「我好少問佢acting tips，想靠自己處理，我知道人哋永遠都會叫我『黃淑儀個仔』，不過我想自己試吓。」他希望可以長拍長有，終極目標可以在香港及外地同時拍電影及拍劇：「𠵱家中國人演員喺溫哥華好受歡迎，有時間我都會去做casting。」