逆權運動未見落幕，大家繼續要喺星期一至五下晝聽班警隊高層開「警謊記者會」，大講廢話兼大話，八方噚日一如以往坐定定睇直播，一開始就聽到警務處助理處長麥展豪句開場白，話香港「經歷咗一場浩劫」好熟口熟面，原來係將星期日凌晨公共關係科高級警司余鎧均講嘅說話「recap」，但八方同時發現，余警司最多用激進示威者形容示威群眾，同一班警隊高層就句句都叫佢哋做「暴徒」。
人肉錄音機重複答案
講番噚日場記者會，繼利君雅之後，港台記者再次「爆seed」，問到台上一眾大Sir口啞啞兼黑面，但其實都係佢哋自己攞嚟，因為佢哋回應時只係不斷人肉錄音機上身，而一直擔大旗負責記者會嘅警察公共關係科總警司謝振中更最無誠意，多次話「頭先講咗」然後重複內容，後來仲索性講明自己就係答非所問，話「我要答係向市民交代當時情況，而唔係你（記者）specific嘅問題」，但既然係咁，又做乜開記者會接受傳媒提問先？