太子站發生8.31警察無差別毆打市民事件，全城震怒之餘，外界批評警察外，仲將矛頭指向配合警方嘅港鐵，更有市民破壞港鐵車站設施以示不滿，不過原來除咗市民外，連港鐵吉祥物基哥似乎都有嘢講，喺港鐵手機應用程式入面竟然好似食咗誠實豆沙包咁，問佢邊度有示威，竟然識答畀警察入過嘅商場名！有網民懷疑係惡搞改圖，但亦有人估係聰明嘅AI惹的禍！
估計AI太聰明惹禍
八方講嘅係港鐵手機應用程式MTR Mobile入面，有個由吉祥物基哥做負責，只要輸入想去邊，就會答你點去、搭邊條港鐵線去到嘅小程式，不過噚日就有網民玩嘢，輸入「燃燒彈」問基哥，點知基哥出咗「警察總部」同點去嘅方法，之後陸續有網民貼截圖，有人輸入「示威」，出咗觀塘apm、德福廣場、太古廣場呢啲俾防暴警打過嘅商場；有人輸入「白衣人」，就出咗元朗站、荃灣站；有人輸入「警黑勾結」，就會出元朗警署；問基哥「邊到有tear gas」，佢又會顯示葵芳站，最好笑係有人問「恐怖分子總部」，基哥顯示有西九文化區，同埋添馬艦駐軍總部！有冇可能咁政治不正確？
由於呢啲只係網民截圖，八方自己又試吓玩，發現輸入「示威」，真係出咗嗰幾個商場名，但之後輸入其他字就玩唔到，一係就話繁忙中答唔到住，一係就話唔知，所以有網民懷疑嗰啲截圖可能係惡搞改圖，但亦網民估計個程式係用大數據寫嘅AI，AI會自動學習最熱門嘅關鍵字，所以有呢啲答案，但估計港鐵已經刪除呢啲政治不正確嘅答案。
李八方