由皇家馬德里外借去馬略卡嘅日本新星久保建英，喺周日西甲首次亮相，成為史上喺歐洲四大聯賽最年輕上陣嘅日本球員，可惜後備入替嘅佢最後都唔能夠為球隊扭轉敗局，馬略卡作客以0:2不敵華倫西亞。
四大聯賽最年輕日本兵
今季被皇馬外借到馬略卡嘅久保建英喺星期日首次為新東家上陣，喺79分鐘後備登場，佢亦以18歲2個月又21日之齡，打破四年前由當年效力多蒙特嘅丸岡滿所保持嘅舊紀錄，成為歐洲四大聯賽史上最年輕上陣嘅日本球員。不過久保落場嗰陣馬略卡已經輸緊俾華倫西亞兩球，佢今場亦冇辦法為球隊反勝，馬略卡最終都係輸0:2，不過久保今場表現都算不過不失，3次傳波全部成功、仲有攔截同偷波各1次。
除咗久保之外，效力緊巴塞隆拿B隊嘅日本前鋒安部裕葵亦都喺星期日嘅西丙聯賽地標上陣，佢今場表現都唔錯，踢足90分鐘之餘仲有2次好有威脅嘅埋門，可惜都入唔到，球隊最終俾塔拉戈納逼和2:2。至於德甲方面，效力雲達不來梅嘅日本國腳大迫勇也就叻過兩位師弟，個人梅開二度幫球隊以3:2擊敗奧格斯堡，打開今季勝利之門。佢嘅隊友祖殊沙根特大讚呢位日本前鋒：「我唔認為佢係不來梅嘅另一個高路斯，大迫就係大迫。」睇嚟一班旅歐日本球員都相當值得期待。
巴利起孖皇馬照失分
講返西甲，久保建英原屬嘅皇家馬德里周日就繼續失分，只能夠逼和維拉利爾2:2，不過一直盛傳會離隊嘅加里夫巴利今場就射入兩球，相信教練施丹對呢位威爾斯翼鋒應該會另眼相看，唔知會唔會間接增加咗久保建英下季重返皇馬嘅難度呢？