新季意甲第二輪聯賽就有大戰上演，上屆冠亞軍碰頭：祖雲達斯主場迎戰拿玻里。球王基斯坦奴朗拿度（C朗）開齋兼喺下半場幫祖記遙遙領先到3:0，諗住贏梗點知之後先係戲肉；拿玻里喺66分鐘開始大反擊連追3球扳平，可惜到補時輸自己，中堅高列巴尼擺烏龍下飲恨輸3:4，祖記有驚無險開季兩戰全勝。
衞冕嘅祖記上周六同上季聯賽老二拿玻里交鋒，15分鐘祖記後衞迪施基利奧就傷出，不過換入嘅丹尼路雷斯26秒就憑一次反擊射成1:0，3分鐘後今季轉着21號嘅希古恩，喺禁區轉身扣過高列巴尼射入靚波，祖記領先2:0。29分鐘基迪拉單刀被救出，兩分鐘後佢再遠射中楣唔入，擴大唔到比數，祖記半場領先拿玻里2:0。
C朗開齋高列巴尼孭鑊
換邊後，C朗接應杜格拉斯哥斯達傳送後建功，幫祖記將比數改寫成3:0。不過拿玻里冇放棄，憑兩件新兵文奴拿斯同夏榮羅辛奴先後喺66同68分鐘入波，迪羅倫素再喺81分鐘接應荷西卡利祖傳送後破網，幫球隊追成3:3！不過喺補時，比真歷為祖記開罰球，高列巴尼喺門前大撻擺烏龍，祖記結果以4:3絕殺拿玻里。
希古恩倒戈入靚波
賽後高列巴尼就喺ig為自己擺烏龍向球隊同球迷道歉，拿玻里教練安察洛堤就話輸波係全隊嘅責任：「我哋今場唯一做得好嘅係絕地反擊追番三球，不過以賽果嚟講好明顯仲未夠好，而且我哋防守上都有問題，2場聯賽失7球，唔係個別球員嘅問題，係成隊做得唔好，球員冇為球隊犧牲嘅決心。」佢又話高列巴尼今個國際賽期唔使返國家隊，佢可以透過呢段時間專心訓練調整狀態。
今場倒戈兼入波嘅祖記前鋒希古恩，就話呢場波好似坐過山車咁刺激：「場波好似坐過山車咁高低起伏，下半場佢哋好快追番兩球，我哋唔應該畀呢件事發生。之後我哋冇咗對比賽嘅控制，被佢哋追和，不過好在最後都全取三分。」
今場對舊東家射入靚波嘅佢表示會留隊爭正選：「我好鍾意祖記、球迷同波衫，我由車路士返嚟後嘅第一秒開始，就已經係想留喺度繼續效力。」