16歲「神童」安素法迪上周六後備建功，成為喺西甲為巴塞隆拿入波嘅最後生球員，不過巴塞作客最後同奧沙辛拿賽和2:2，又失分！巴塞今場七分鐘就失波，半場落後0:1。不過喺下半場上陣嘅法迪喺51分鐘，接應卡利斯佩雷斯傳送後頂入追平，呢球仲係佢職業生涯首個入球，仲以16歲零304日成為巴塞隊史喺西甲入球嘅最年輕球員，到64分鐘卡利斯佩雷斯再交助攻，另一後備兵艾法美路妙射破網，巴塞超前2:1。可惜到81分鐘，碧基喺禁區犯手球，奧沙辛拿嘅羅拔圖托利斯主射中鵠追到2:2完場，今季首輪意外輸波嘅巴塞，未能繼上場5:2大勝貝迪斯後添食。