安志杰(Andy)、伍允龍及吳建豪16年前因合作拍電影《少年阿虎》而結為好友,三人由後生仔變成中佬,當中變化最大是Andy娶了名模老婆Jessica C.兼育有一對可愛子女;吳建豪則由結婚再度回復單身。相比下,伍允龍顯得平淡得多,緋聞不多,默默耕耘,但唯一不變的是三子的兄弟情。
醞釀了16年,三人再度聚首合演電影《潛行者》,伍允龍和Andy日前在九龍灣接受訪問,回想當年拍攝《少年阿虎》,對其中一個拍攝場地屯門樂安排印象深刻,伍允龍說:「因為我哋都受80年代電影嘅影響,當時見到成龍大哥、洪金寶大哥同元彪大哥嘅戲,有動作又有喜劇成份嗰啲,我哋都想做呢類型嘅電影。講咗咁耐終於做到,今次我哋仲返去嗰個location(屯門樂安排),大家坐番當日同樣嘅位置。」
睇住對方大
首次擔任動作導演的伍允龍,直言和好兄弟合作,也難免有意見不合的時候,不過往往都是自己先讓步。伍允龍又指大家同樣拍得一點也不輕鬆,他說:「以前都係幫人設計動作,有啲idea未必有機會用到,今次可以將呢啲idea融入去。」問到對伍允龍首任動作導演的評價?Andy大爆:「我睇住佢大,對我嚟講,佢唔係新手,由武師、替身、演員、動作演員,到𠵱家係producer,成績非常好,同埋佢有好多錢。」伍允龍隨即回敬,踢爆Andy為玩槍可以不吃飯,他說:「咁我咪買一堆子彈畀佢玩囉!」
難忘槍戰戲
Andy自言最喜歡的一個場口,就是自己的槍戰戲,他說:「嗰個shot雖然分零鐘,但要配合機位,又唔夠時間,最後拍咗兩個take就OK,我自己睇番都覺得靚。」伍允龍表示還有其他想拍的故事,但需要投資者,希望不用再等十幾年:「十年後,腳都踢唔起喇!𠵱家有經驗,知道邊啲可以做,邊啲唔可以做。」
撰文:盧妹
攝影:仇志德