巴黎聖日耳門（PSG）嘅前鋒尼馬，成日同巴塞隆拿、皇家馬德里扯上關係，近日佢嘅名錶贊助商就喺ig發佈一張尼馬着咗今季巴塞主場波衫嘅相，不過曝光幾分鐘就秒刪。但尼馬似乎未必走得成，據天空體育報道，由於PSG同巴塞唔可以達成協議，尼馬已經決定留隊喇。巴塞本身有望喺9月2號閂窗前完成呢宗成2.36億鎊嘅交易，當中包括1.82億鎊加埋拿傑迪錫、圖迪保同奧士文尼迪比利外借至季尾。但有風話迪比利唔想去PSG過一季，令呢宗交易仲係好複雜，更有傳尼馬同意履行餘下合約嘅情況下，PSG已終止任何舉動。總監李安納度都暗示交易好煩︰「我哋對尼馬可能離隊嘅立場明確，係人都知我哋想要咩。我哋喺8月27號收到第一份書面報價，不過就reject咗，家陣就冇同任何球隊達成協議。」