警察前晚喺港鐵太子站上演真實版「屍殺列車」，喺車廂見人就打，即使克警噚日繼續死撐佢哋冇做錯，但啲片已傳到全世界睇到，正所謂有片有真相，是非黑白唔係克警話係就係，其實克警又豈止無差別打市民叻，原來有理冇理扣查市民仲叻！今次就話懷疑有市民用巴士劫獄！
熄冷氣查問
fb專頁「巴士台」前日出po話有團體前日搞巴士遊，因遊河路線經過新屋嶺以南嘅恐龍坑，令班克警好緊張，怕有人用巴士劫獄，於是將巴士同參與活動人士包圍查問，將參加者禁錮喺巴士上面近大半小時，又唔畀巴士開引擎同冷氣，專頁引述辦遊河活動嘅「Prawncracker Bus Tours蝦條巴士」話，警方用11部警車將巴士同參加者包圍，又有警員用極不禮貌態度叫佢哋離開恐龍坑範圍。
揸架巴士去劫獄？真係講出嚟都冇人信！《蘋果》記者搵到活動主辦人周先生，佢講過程同專頁所講差不多，佢哋抵達恐龍坑後落車影相，就咁俾11架包括衝鋒車在內警車包圍，所有人要出示身份證，查相機、手機同隨身背包，周先生又話差人冇講扣查原因，只係話現在係「敏感時期」，唔信佢哋只係影相，又質疑佢哋目的係接走疑犯，又話除咗有軍裝警員查佢哋，仲有身穿迷彩服邊境巡邏警，又有警員叫佢哋坐好，唔好搞事！最後梗係乜都搜唔到放行！
八方見到克警連班巴士迷影相都怕成咁，仲可以幻想到有人劫獄無理扣查，唔怪得咁多市民鬧佢哋成日屈人犯法！
李八方
