上周六德甲，拜仁慕尼黑喺主場6:1大炒緬恩斯，新兵菲臘比古天奴同比列錫完成主場處子戰，今場拜仁六球都由唔同球員射入。開波六分鐘，拜仁就落後，好在36分鐘比列錫左路傳中，同樣係新兵嘅班捷文柏華特喺後柱凌空抽射為拜仁追平；臨完半場拜仁有罰球，阿拉巴喺禁區頂射個世界波，就咁反超前。下半場拜仁繼續攻，54分鐘，柏華特傳中比列錫頭槌入波；63分鐘京士利高文接應角球，喺後柱搶射入，拜仁領先到4:1；78分鐘，湯馬士梅拿助攻羅拔利雲度夫斯基喺禁區內搞掂，5:1喇；兩分鐘後，梅拿再助攻艾方素戴維斯，後者射空門埋齋。最終拜仁喺先失一球下反勝緬恩斯6:1，家陣3戰2勝1和。