內地唔少富豪背後都會養住一啲女明星，好似「大富豪」就包養咗影壇紅星「清清」好多年，清清以為有日大富豪會離婚畀佢坐正，但跟咗好幾年之後，發現大富豪始終唔肯為佢同老婆離婚，佢就開始心死，後來「陽陽」追佢，佢就移情別戀，不過大富豪對清清未忘情，明知佢有陽陽，一樣同佢保持聯絡，間中打吓友誼波。
不過打吓打吓友誼波，清清竟然意外有咗，仲要係仔，大富豪就畀佢生出嚟。清清因為小朋友唔見得光，所以唔敢公然帶個仔出街，大富豪對呢個私生子係負責任嘅，今年年頭生完BB之後，仲送咗過億珠寶獎勵佢，不過大富豪因為好尊重老婆，所以就算清清幫佢生仔，佢都要求清清繼續保持低調，免得令老婆唔開心。
早排清清有啲困難，大富豪都盡量想辦法幫佢，以自己人脈幫佢解決問題，對清清算得上係仁至義盡，陽陽對清清嘅關心，都唔及大富豪，所以清清父母唔係咁鍾意陽陽，覺得個女係揀錯對象，縱使明知大富豪唔會同老婆分開，佢哋都寧願個女繼續跟個有婦之夫。鬼咩！大富豪成日送禮畀兩老，就算同清清表面上分手，一樣喺大時大節人到禮到。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。