民陣8.31遊行被禁 ，一直支持逆權運動的阮民安（Tommy）昨日以歌娛眾，約於傍晚5時現身銅鑼灣busking，吸引逾千市民圍觀。阮民安在場與市民叫口號，被讚有型的他，只謂只是做正常藝人應該做的事情，並呼籲齊心：「呢場仗未贏，我哋都未完。」
阮民安昨日在fb寫上：「噚日發現有九個手足因為莫名其妙嘅理由俾人拉咗！感覺無奈又憤怒！今日起身發現上唔到連登，咁啱今日又冇嘢做，好悶，咁不如出嚟唱歌啦。」然後他宣佈：「『沒有國泰，還有民安』港島區流動演唱會，喺下午3、4點左右銅鑼灣隨時開始。」約於傍晚5時Tommy現身銅鑼灣，吸引逾千市民圍觀，逼爆整條東角道。甫現身，他即與市民齊齊大叫「香港人加油」及「五大訴求，缺一不可」。現場氣氛高漲，有人大叫「沒有國泰 只有民安」及「我最喜愛男歌手阮民安」，又有市民大讚他比余文樂更有型，Tommy聞言說：「我知呢啲係戲言嚟，唔好搞到我俾樂仔啲fans鬧呀。」
本來上海開工
Tommy坦言從未做過busking，只想娛樂大家：「行街、睇戲、唱歌，其實係好基本嘅周末娛樂，有朋友叫我小心啲，我都唔知要小心啲乜。本來我今日要去上海做嘢，但因為一啲政治表態，令我上面嘅工作失去咗。其實之前我知道自己呢三日唔喺香港，我想喺度陪你哋多啲。」圍觀市民即歡呼大叫。Tommy隨即獻唱陳奕迅的《今日》打頭陣，市民用手機燈做星海，又唱E-kids經典歌《開始戀愛》，全場齊齊大合唱。Tommy有感而發說：「今日唔係甚麼endgame，只係一個周末咋，呢場仗未贏，我哋都未完㗎。」由於圍觀的市民越來越多，有市民自發坐在地上。
Busking後，Tommy大讚氣氛很好：「我見平日都好多人喺呢條街busking，成日都想出嚟唱㗎啦，又驚人哋唔預我玩，所以今日自己出嚟唱。」他表示第一首選唱《今日》，因為這首歌陪伴他經歷很漫長的低潮：「嗰時我大部份時間都聽住呢首歌啲歌詞、旋律、Eason嘅聲線，聽完畀咗我好多力量，我覺得做歌手就係咁。」Tommy希望自己的聲線也可給大家力量。他坦言沒想過這麼多市民圍觀：「我本身旺角人，今日要踩銅鑼灣個場，旺角同銅鑼灣正式connected。」並表示只是做香港藝人正常應該做的事，他說：「我只係土生土長香港人，我好愛香港，就算犧牲咗一啲嘢，我覺得都係好正常，呢場仗，我哋繼續一齊打落去，好嗎？」
唔會驚大搜捕
談到上海的工作被取消，Tommy坦言原定工作已傾好酬金及細節：「我講得呢啲嘢都預咗，𠵱家即時有影響，好多內地工作都取消或者延遲。」對於前日警方高調拘捕多位人士，Tommy說：「我覺得好不可思議，呢啲冇道理嘅濫捕，只會令香港人更加團結，香港人係唔會驚嘅，用得着我嘅地方隨時搵我，我會喺度。」
採訪：盧妹
攝影：林賓尼