這陣子的李彩華難得在港，忙於為本月公演的舞台劇《恆河經變》排練，對於近年幾乎長駐內地拍劇的她，早已習慣周圍飛的生活，即使婚後也因為老公要周圍飛傾生意，兩人也一時北京、一時香港，兩地相聚。
「我自己係一個幾鍾意周圍走嘅人，空閒少少我又會飛，我都係較為漂泊嘅一個人，所以都冇乜所謂。」李彩華說。
享受漂泊不求安穩？「要安穩得嚟又要周圍漂泊，我覺得其實係難嘅，但係我自己就OK囉！」的確，「回家」對李彩華有雙重意義，2011年拍了內地劇《回家的誘惑》之後，她的世界從此不一樣，屋企的債務可以一筆清，連自己的身價也逐級跳，進身圈中小富婆行列。
如果說八年前的《回家的誘惑》是分水嶺，李彩華的前後人生真的大不同，她說：「先苦後甜之後嗰種感覺係更加好嘅！」
撰文：文嘉龍
攝影：陳慧安
好多嘢係上天安排
今次回港為佛教舞台劇《恆河經變》演出，身為基督徒的她，本身也經過一番考慮，「大家溝通完之後我都話要考慮吓，同埋要我哋教會嘅牧師同弟兄姊妹，徵求佢哋意見，因為同本身基督教信仰有啲衝突，所以都要好尊重大家，自己要慎重考慮。」經牧師意見後才得以接下演出。
中港兩邊走的生活，李彩華早已習慣和你飛。「其實都習慣咗，我自己都幾鍾意周圍走喎……其實好多嘢都係上天嘅安排，當年輕啲嘅時侯，二十零歲就不斷有好多呢啲緊密嘅嘢俾我嘗試咗，去到𠵱家又好啲，可能一套劇中間又可以穿插其他工作，我覺得好多嘢唔係話自己去plan嘅，我覺得都係一個上天嘅安排囉！」
李彩華在訪問之後要為舞台劇排練，對手有李國祥和倪秉郎等人，李彩華獨自來到排練場地，頭戴太陽帽一身運動裝束，依然少女味，連她自己也說：「好似之前見到家燕姐（薛家燕），我都係着得比較少女啲，符合返自己年紀好young咁樣，家燕姐就話，阿彩華真係完全唔似結咗婚喎，都仲係咁𡃁妹！」
小學已經諗結婚的李彩華，小時候希望自己可以24歲結婚，「嗰時小學大家就已經喺度諗，唔得我24歲要結婚，即刻要生仔喇，之後到我35歲嘅時候，個仔就已經10歲啦，45歲嘅時候個仔就20歲，係有咁諗過，但係呢啲已經完全不能發生，過晒喇啲時間，同埋我都話喇，呢啲嘢係冇得諗將來㗎，即係當你10歲嘅時候諗，去到你20歲嘅時候其實個世界已經唔一樣。」
去年的11月11日（光棍節）即李彩華生日當天，男友求婚成功，今年情人節李彩華在微博宣佈與拍拖半年的內地男友Eric Huang閃婚，已於2月2日在內地領證。有說38歲的Eric在內地經營大型鋼鐵生意，身家背景豐厚。
新婚半年成為黃太的李彩華說，「其實同佢拍拖之前嘅五年已經認識，拍拖就半年，其實大家中間都冇乜溝通，冇乜感覺嘅時候就唔係好騷人，但係去到有真心溝通嘅時候，就係我之前分手，之後佢得悉我分咗手就開始有搵我，傾多啲偈啦，大家溝通吓又覺得好似OK喎，後尾慢慢就開始咗。覺得大家嘅人生目標比較一樣，都好希望有個家庭，過往嘅經歷係有講過話想有家庭，但往往去到嗰個點嘅時候，又冇咗下文，我自己𠵱家回想返其實係好事，可能咁啱同佢哋有將來嘅，未必有咁好啦，所以我覺得上天對我好，將好嘅嘢留畀我。」
諗住拍完就唔撈喇
李彩華說，老公和以往的男朋友最大的分別，是講得出做得到，「即係唔係口噏噏，唔係齋吹水完之後就當唔係囉，就算唔係話結婚呢一點、唔係話人生呢一個方向，好多好細微嘅嘢你都會feel到佢講咗又真係會做，都幾信得過咁樣喎！」
李彩華的情史，大家知道的有初戀的林峯，之後的蕭定一、保險才俊王森楠（前名王傲山）、金融闊少潘啟翀，再到拍拖三年的「新五虎」何遠恒……有和平分手，又有再見不是朋友的，前度是否都信唔過？「我又唔可以話以前信唔過，只係我哋大家唔合適啫，chemistry唔啱囉，產生唔到一啲好嘅化學反應，每個人都會同某一啲人產生到化學反應，咁可能我同佢哋產生唔到，佢哋同第二啲人產生到，我覺得只係我哋嘅分子接合唔到啫！」
以往的戀情，愛過痛過，「我自己係好重感情，每一段感情付出咗之後，得到一個唔係咁好嘅結果嘅時候，自己都會好傷心，所以都冇話邊一段會係特別傷心，我覺得每一段自己都會投入咗一啲嘢，可能個化學反應唔啱，爆炸唔到囉，所以變咗另一隻爆炸，但係𠵱家所有都變咗往事啦，令到人成長嘅一樣嘢。」
愛情之苦，都不及事業打擊重。李彩華的人生，經歷兩次賠錢解約，一次是出道時候黃柏高旗下的金牌娛樂，另一次則是林小明的寰宇，「一開始出道嘅時候我都係有信心嘅，因為做model嘅時候都覺得OK，但係可能嗰個時候嘅年紀太細，好多嘢都唔係好了解，去到沙士（03年）期間又經歷解約（金牌），之後另一間公司又經歷解約（寰宇），其實都灰㗎，覺得自己問心都係一個乖女吖，係一個好人，點解都要經歷咁多，可以講話係人生之中幾震撼囉！」
灰到盡頭，那時候正在內地拍《回家的誘惑》，李彩華打算拍完就退出娛樂圈，「諗住拍完算喇，唔撈喇，覺得自己做呢行可能唔係好啱，諗住算啦，會唔會有主好人家就嫁咗去算！即係往往人生喺好低谷，去到唔知點做嘅時候，唔知點解又突然間出現咗個彩虹同光明，嗰時《回家的誘惑》又分手啦，其實好傷心，正正我入面又勁多喊戲，所以我覺得完全係上天嘅安排，我覺得好多嘢唔係自己去諗，我覺得係我嘅人生轉捩點。」
喊感動天，更加感動了強國觀眾的玻璃心，《回家的誘惑》令李彩華在內地彈起，之後密密接劇，由幾萬人仔一集跳到三十萬人仔一集酬勞，密食當三番。
無條件肯借錢畀我
兩次的解約事件有幾傷？「兩次都好傷，第一次嘅傷就係本身屋企已經係需要我去負擔啦（父親債項），解約嘅時候又要去賠錢，咁好彩當時嘅賠錢，就係下一間公司佢哋幫我去墊支住先，因為趙小姐（寰宇林小明前妻趙雪英）好好啦，佢好錫我，係因為佢我先會入去佢間公司（寰宇），後尾亦都因為佢哋嘅婚姻有問題，而令到我又需要解約，亦都需要再去賠一個更『甘』嘅錢，但係都冇辦法，我覺得要走嘅始終都係要走，嗰個moment就算未去到好光明嘅時候，都覺得希望解約之後可以有一片新嘅天地，我覺得選擇都係正確囉！」
因為解約，先有機會出現《回家的誘惑》。「解完約之後拍《回家的誘惑》諗住算㗎喇，唔做㗎喇，當時我就冇咁多錢啦，都係趙小姐幫我畀住先，我再還返畀佢，所以我覺得雖然人生有好多好巨大嘅經歷，但係都有好多好好嘅人喺身邊幫我，無條件咁樣肯借住錢畀我先，之後等我做嘢再還返，我一直都諗住唔做㗎嘛，心諗都唔知點還（錢），但係又唔知點解突然間《回家的誘惑》令到我人生嘅一個轉捩點囉！」
除了感激趙小姐知遇之恩，李彩華更感激媽媽一直在身邊支持自己，「媽咪真係好感激嘅，佢都好辛苦呀咁多年嚟，為咗屋企為咗我哋，好感激佢；繼而就係趙小姐啦，因為都好感謝佢帶我入咗佢公司，拍咗《昭君出塞》，係第一個內地嘅電視劇亦都係中央電視台嘅，繼而開始內地有好多人認識啦，雖然好景不常，佢同林生嘅婚姻又有問題，去到我解約嘅時候，佢又幫我，幫我解完約之後佢有好多嘢都繼續幫我，所以真係在心中。」
說到媽媽，「嗰時最低潮嘅時候令我捱得過嘅念頭，其實我覺得我唔算係捱過啲乜嘢，其實媽咪仲辛苦過百萬倍，因為可能屋企嘅事，佢又要問啲親戚朋友借錢，佢心裏面其實係難受。」李彩華哽咽。
有說李彩華為屋企還債，多年來還了數百萬，她說：「其實我都唔係好知（還幾多），你𠵱家問返我，我淨係知道嗰時工作完，啲錢就係畀屋企，我都唔知係點，亦都冇去問過，所以講到底，媽咪係最為辛苦百萬倍囉！媽咪係好傳統嘅，即係佢會覺得問心無愧，佢覺得大家係一家人係一定要幫。」
債一早還清，李彩華說現在算是父母享福之時，「所以都話當你先苦後甜之後嗰種感覺係更加好嘅！我覺得人生經歷挫折波折或者唔好嘅事，其實唔好氣餒，我覺得梗有一日，你係會有好嘅一天來臨囉！」
【後記】超芝趕琳
經歷過兩次與公司解約，李彩華之後一直靠自己，經理人一職索性由李媽媽披甲上陣，更加是財務總管。她笑說：「佢其實係收錢囉，都要催吓嘅有時，又唔可以話係催，係提醒囉，因為講真一個劇組咁多演員，大家可能簽約出糧嘅時間都會唔一樣，大家互相提吓囉！」
李彩華2000年16歲出道之時有個朵，登上雜誌封面被封為「超芝趕琳」的新人，芝係張栢芝、琳係陳慧琳。二十年人事幾番新，今天李彩華說起，「記得呢個名，可能係包裝囉，亦都唔會覺得係好太壓力喎，因為自己都好年少，都唔知發生緊乜嘢事！」
早出道有早出道好，經歷幾匹布咁長，李彩華先才35歲，上半場仲有排玩。