【挑釁群眾】
【本報訊】警方前晚在深水埗警署外拘捕多人，過程中警員語帶挑釁，向在場市民指「又拉到人真開心」，即使市民按指示後退，亦被警員拉走。警察公共關係科高級警司江永祥回應時質疑，正離開的市民故意與警員拉近距離，「呢個真係要問佢自己先知」，並指警員宣佈拘捕人數，可能是希望大家離開，「都係溝通嘅一種方法」。
記者：李詠希、曾偉龍
警方前晚在深水埗警署外再拘捕18人，再有警員被指拉走按指示後退中的市民，片段顯示，防暴警員要求一名男子後退，質問對方「你係咪唔走？」男子則回應「行緊啦！你見唔X到呀？」防暴警員稱「嚟丫！」男子回應「走緊呀，嚟乜嘢呀！醒少少呀！」防暴警員便要求查看男子身份證，並拉住男子，雙方期間有推撞。
江永祥在警方例行記者會上回應時指，「究竟嗰個人係咪後退緊，或者佢故意後退得慢啲，同我哋同事距離做到咁短，甚至乎零距離呢？呢個真係要問佢自己先知」，他表示曾看過相關片段，警員當時認為該男子不想離開，上前時對方有激動情況，遂控制其情緒，最終沒有拘捕對方。
巿市民被推跌 「唔明點解佢掙扎」
警員亦語帶挑釁向在場市民宣佈「又拉到人真開心呀」，江則指，警員因應場面決定與公眾溝通的語氣、聲量和堅定程度，「驅散過程裏面難免我哋要以比較肯定地同埋堅定嘅語氣叫大家離開」，並稱沒有實際聽見該警員說話語氣，「可能都係話番畀大家知我哋作出拘捕，叫大家離開嘅啫，都係溝通嘅其中一種方法啦」。至於母親在街上尋找被拘捕的兒子時，亦遭到警員呼喝，以及遭警員以胡椒噴劑指嚇，警方則未有回應。
上周日於大窩口港鐵站有街坊被防暴警截查時無故被推落樓梯，江永祥稱，當日有警員在警車停下時遭雷射光照射，故前往大窩口港鐵站附近追截，並截查部份人士，他形容部份人士情緒激動，有掙扎和身體碰撞，「有人跌過落地下，我亦都唔明點解佢要掙扎啦」，截查後發現該人士沒有可疑，故讓他離開。
另外，警察公共關係科總警司謝振中表示，今年8月截至29日，999報案回應時間未達標的個案有324宗，較去年8月的204宗增加47%，警方十分關注，星期六、日及公眾假期未能達標較多，認為是受公眾示威活動影響。