從前有個人，佢讀書嗰陣年年考第一，有次佢考第四就哭成淚人，後來，呢個人成為香港第四個特首，佢又喺好多方面攞咗第一，終於，佢冇哭成淚人，反而市民欲哭無淚，呢個人就係林鄭月娥。林鄭最近又攞第一，原本打算下個月訪美嘅佢，有傳因為由佢一手策劃、推動嘅反送中運動欲罷不能，有可能唔去勾結「外國勢力」，唔知係想坐鎮香港研究點立《緊急法》，抑或怕訪美期間都俾示威者包圍？若然佢唔訪美，就打破歷任特首上任最耐都唔訪美嘅紀錄喇。
歷任特首上任一年內出發
以為前特首梁振英係最差嘅時代？勢估唔到一山還有一山低。講返訪美呢個話題，香港史上第一位特首董建華，1997年7月上任，9月就去美國訪問，獲時任總統克林頓接見。阿董腳痛落台，曾蔭權2005年6月上任，佢比阿董遲咗少少，10月先至訪美，仲相當之唔好彩，因為時任總統喬治布殊要視察美國風災，只能見到時任副總切尼。
到上一任特首梁振英，2012年7月上任，拉布拉到2013年6月，差不多足足一年先至訪美，仲要唔係獲白宮官員接見，只係約見時任紐約市長彭博。比起煲呔更唔好彩嘅係，梁振英去到美國就發生斯諾登事件，跟手彭博仲取消埋個會面，梁振英慘食檸檬。
輪到2017年7月上任嘅林鄭，2018年12月先至……透露翌年訪美。𠵱家咪翌年、2019年咯，仲過咗成八個月㖭。八方聽聞林鄭本來打算9月去美國，見邊個就唔知喇，有傳佢本來會去洛杉磯宣傳大灣區，但𠵱家反送中都未完，分分鐘去到洛杉磯都遇到反送中示威，據聞政府或者改派局長代林鄭訪美。
八方曾就林鄭係咪取消訪美向特首辦求證，同五大訴求一樣，一直冇回應。
李八方