過去兩個幾月，相信好多香港人都同八方一樣，俾呢個堅持唔肯回應市民訴求嘅特首林鄭月娥政府搞到身心俱疲，一班前線記者尤其辛苦，好多記者每日都直踩十幾粒鐘，前線同事仲要成日中椒食彈，無非係為咗守護香港人嘅知情權。
到咗噚日，《蘋果日報》手足終於可以輕鬆一下，事關壹傳媒創辦人黎智英喺將軍澳《蘋果》大樓搞大食會，有燒豬、燒牛肉、魚生等等，名副其實大魚大肉，慰勞員工。
肥佬黎話，多謝晒咁多位手足喺過去兩、三個月堅守崗位，仲話可能再有兩、三個月要辛苦大家，意味呢場逆權運動有排先完，點知有同事即刻問：「兩、三個月咁快？」，肥佬黎笑答：「可能仲要食好多次，慰勞你哋好多次！」跟住勉勵手足繼續為香港人做事，然後一齊高叫：「香港人加油！」