現年65歲嘅韓馬利（Mary）89年同第三任丈夫、配音員杜燕歌結婚，兩個𠵱家都好恩愛，之前有《蘋果》讀者捕獲佢哋着行山裝坐東鐵，杜燕歌仲好體貼為老婆整理草帽。Mary姐囝囝上月底結婚，之前睇結婚相見佢精神奕奕，估唔到前日佢喺fb留言：「經過兩星期同死神搏鬥，感謝天父的保守，我今天終於出院了。」
「好虛弱成日要瞓」
Mary姐噚日回覆傳媒，把聲好微弱咁話：「我患咗腦膜炎，呢段時間好彩係休息，我出咗院，不過好虛弱，成日都要瞓覺。」韓馬利喺圈中人緣好好，佢走過鬼門關嘅帖文上載後，圈中朋友個個問候同祝福佢，汪明荃留言：「你要好好休息、保重身體呀！」陸浩明都話：「祝福你！為你祈禱，身體健康。」林子博同翁靜晶亦祝佢早日康復。
Mary姐今年初喺無綫節目《不老傳說》中，曾經分享多年前患焦慮症嘅痛苦經歷，佢話嗰陣心跳加速、呼吸困難甚至窒息同手震，嚴重時仲有幻聽，有把聲話佢「冇鬼用」，精神大受困擾，後來睇醫生，佢知道病源係自己要求高變成壓力同負面情緒，所以佢近年減產，享受同教友嘅生活，仲寓興趣於工作，愛跳舞嘅佢同蘇志威開舞蹈學校，擔任行政總監。
撰文：馮仁昭