英超自上季實施新例，轉會窗喺開鑼日前關閉嘅措施後，唔少英超領隊都好唔滿意，其中最大影響嘅可能係紅魔鬼曼聯。
事關佢哋自從轉會窗閂咗之後，先有前鋒盧卡古轉投意甲國際米蘭，最新消息話智利前鋒阿歷斯山齊士會去埋國際，禮拜三「山神」仲已經到咗米蘭等簽約，九成九會走人；而中堅基斯史摩寧就將被外借去羅馬。曼聯前鋒位置「有出冇入」，得番拉舒福特、安東尼馬迪爾同17歲小將格連活特3人，都唔知捱唔捱到去冬季轉會窗囉！
山神走埋 蘇B唔夠前鋒
根據𠵱家嘅規例，英超隊喺開鑼後就唔可以再買人，但賣人或外借球員就冇問題，令到英超比起其他歐洲球隊，少咗大約三個禮拜增兵之外，仲要面臨球員被挖走實力削弱嘅風險！英國BBC就報道，曼聯前鋒阿歷斯山齊士即將會以借將嘅身份加盟國際米蘭，同前魔兵、今夏以7,400萬鎊轉投國際嘅盧卡古再做隊友；目前山神已經到咗米蘭，預計佢接受完體測之後，就會正式簽約。
Big 6主力 排住隊走人
山神加盟國際嘅最大阻礙，當然係喺曼聯嘅超高人工喇！據報山神轉投國際周薪都高達40萬鎊，遠遠超出國際嘅薪酬架構，有傳佢哋曾經向曼聯提出，願意為山神畀當中嘅15萬鎊，其餘25萬鎊就由曼聯埋單，不過曼聯明顯想國際出多啲囉。亦有消息話，「山神」佢願意減年薪100至150萬鎊，喺曼聯畀部份人工之下，估計國際只需要畀450萬鎊年薪，就可以借用山神一季。
其實除咗曼聯之外，其他Big 6球隊都有唔少球員，好可能會喺轉會窗閂咗之後流失。其中熱刺中場核心基斯甸艾歷臣，下年合約到期嘅佢仲未肯同熱刺續約，盛傳只要有球會畀得起5,000萬鎊就可以走人，另外阿仙奴嘅中堅梅斯達菲、曼聯中堅基斯史摩斯同菲爾鍾斯、利物浦中堅洛夫雲等昔日球隊主力，都有機會喺轉會窗閂前離隊，就算佢哋唔再係球隊主力，或多或少都會影響Big 6球會嘅板凳深度，難怪紅軍領隊高普、熱刺領隊普捷天奴同李斯特城領隊羅渣士，都提出英超轉會窗改回舊制，同歐洲其他聯賽同步結束轉會窗喎！