有人話，愛嘅反面就係恨，呢句話喺新民黨主席葉劉淑儀同匯賢智庫政策顧問袁彌昌身上完全體現。袁彌昌原來月中已辭任政策顧問一職，仲話呢壇風波令智庫工作停頓；早排仲盛讚袁嘅葉劉聽到袁彌昌咁講就爆seed，鬧爆對方「幫唔到手」，強調係「我炒佢」至真，仲叫袁要有口德，「分手」都唔好唱衰舊東家喎。
袁彌昌自從同新民黨立法會議員容海恩拉埋天窗之後，退居幕後只留任匯賢智庫政策顧問。近日修例風波，袁多次高調同身兼行會成員嘅葉劉大唱反調，袁噚日同八方講，8月初喺討論智庫未來動向時向葉劉請辭，佢話修例風波令智庫研究工作停頓，相信自己暫時「冇嘢可以做」，決定辭職，佢計劃下學期會返大學教書，亦會處理家族生意。
鬧袁唔返工 「係我炒佢」
對於袁彌昌離職，葉劉非常激動，怒轟：「係我炒佢，唔係佢辭職，佢都冇貢獻，我出糧畀佢但係佢乜都做唔到，又成日唔返工，既然佢唔能夠作出貢獻，就辭咗佢」，葉劉繼續動肝火：「我想同阿『袁博士』講，離開就離開，唔好成日唱衰人，之前離開民主思路嘅時候都係咁。」然後又再大鬧工作停頓係因為袁無能：「叫佢搵大學合作做國民身份認同又搵唔到，成日唔返工，淨係（喺報章）寫文，佢又點知智庫發生乜事呢？」夾喺葉劉同老公中間嘅容海恩，會唔會左右做人難？