根據ESPN同英國BBC等報道，巴塞隆拿進行咗第三次報價，用1.7億歐元（約14.8億港元）同巴黎聖日耳門就尼馬轉會談判達成協議，但係尼馬會以先借後買嘅形式重返呢間西甲豪門，而且巴塞會將隊內嘅奧士文尼迪比利作為交易籌碼。
對比上次1.5億歐元報價，巴塞將轉會費提高多2,000萬歐元，但考慮到巴塞今夏已花費超過兩億歐元引入基沙文同法蘭基迪莊等球員，為免影響財政平衡，尼馬會先以外借形式來投，借用費嘅4,000萬歐元將會包含喺整宗轉會內，並喺2020同21年再分兩期付清餘額。不過，巴塞𠵱家有待確認嘅唯一問題，就係呢間西甲球會可唔可以說服迪比利過巴黎，可以喺下周一歐洲轉會窗關閉前完成呢宗交易。