【黑鏡線索】
2007年，當時仲係科技巨擘嘅Yahoo，被指配合中國政權，交出兩個記者用戶嘅資料，最終兩人被判監十年，聽證會上，議員當住創辦人楊致遠面，直斥Yahoo係「科技上嘅巨人，道德上嘅侏儒」。
同樣嘅戲碼，之後仲不時上演，只不過換咗係另一啲科技公司。其中個朵最臭嘅，應數facebook，由Cambridge Analytica用戶私隱事件，到對fake news嘅處理，大家都強烈覺得，fb為咗實現佢嘅偉大藍圖，或者搵多一個幾毫，係絕對唔會介意道德上打吓折扣。到底實際有幾黑，好難講，但佢累積出嚟嘅「道德侏儒」形象，令到今時今日，冇乜人會畀benefit of doubts佢。
喺中國立場上，係人都知，Zuckerberg非常非常想打入中國市場，基本上殺埋入去，就差唔多做晒全人類，於是乎又去學普通話，又邀請習大大幫佢個女改中文名，做到非常露骨。而有傳fb香港2016年請嘅負責香港公共政策、來自中國嘅阿頭，任務係打好同中國關係，希望有日令Zuckerberg嘅中國夢成真。
消失的7分鐘 想點噏就點噏
嚟到反送中運動，首先令人關注嘅，係消失的7分鐘事件。事源721元朗廝殺列車恐襲當晚，now新聞有做fb live直播，之後有人發現，後來嘅片，比起直播嘅原片，中間少咗7分鐘，而呢消失7分鐘嘅內容，包括高級警官見記者前，入村同白衣人傾談嘅情況。
咁呢7分鐘片段點解消失？Now話唔係佢哋自己剪走，呢個講法普遍大家相信，因為fb提供畀媒體用嘅工具，係冇呢個剪live嘅功能。如果係咁，最大可能，係fb內部造成。fb之後話，可能係backup條片嘅時候出咗問題，唔係特登剪。事實係點？任得佢噏，又冇得獨立調查查吓佢。
fb本身不擇手段嘅形象，加上積極討好強國政權嘅行徑，好難唔令人懷疑，fb喺今次運動冇出啲陰招。例如，好多人分享過，見到好多老作嘅新聞喺fb流傳，不斷去舉報，但似乎完全冇效果，反而一啲批評警察執法嘅post，就好快被刪除。係，前幾日終於走出嚟話停咗幾十個發佈假新聞嘅賬戶，但係第一，佢係喺Twitter出手停咗十萬計嘅中國賬戶之後，先至出手。第二，停得咁少，明顯係hea做。第三，甚至連hea做，都有可能係今次由Twitter搵fb美國總部，跳過香港分部，先做啲嘢。
誠信破產 講乜都嘥氣
點解要講「科技巨人道德侏儒」，而唔係「賣魚巨人道德侏儒」，係因為科技影響特別大，出事嘅後果特別嚴重，所以誠信特別重要。fb係形象差，777政權直頭係誠信破產。監控燈柱俾人拉低，係好正常嘅發展，無論楊偉雄點樣同大家講其實啲監控燈柱點頹點廢，呢個功能熄咗嗰個功能未ready，甚至恐嚇阻礙5G發展，都係無補於事，因為一旦硬件豎立，軟件隨時upgrade，而掌握資訊嘅誠信破產，講乜都嘥氣，香港人為咗對抗今日新疆明日香港，一支都不能起嘅意志堅定，係好正常嘅自保行為。其實而家好多私人地方，由各大商場到海洋公園，都已經做緊人面辨識，今次監控燈柱事件，搞搞吓隨時燒埋落私人場地，咁就真係要多謝777。
撰文：宋漢生