日前特首林鄭月娥落區匿埋搞閉門對話，結果俾人爆佢話因差人怕俾人查警暴，所以唔搞獨立調查委員會。娥特星期二開行會前，就大大聲否認呢個說法，點知原來成個會面俾人錄晒音。噚日條聲帶一公開，即刻踢爆娥特大話連篇，真係有講因差人反對所以唔搞獨立調查委員會，又對搞對話大潑冷水，但最搞笑係特首辦為娥特講大話補鑊手法，竟然係出稿將政府同娥特割席，唔少政界中人睇到，都唔知好嬲定好笑。
過往閉門會面好真心
特首辦篇稿話，777係個閉門會面中提及，有關警務人員的看法，係事實陳述，「與特區政府的立場無關」。有政界中人睇到呢句，真係嘆為觀止，事關777用特首身份出席對話，如果連特首講嘅野同政府立場冇關，咁邊個講嘅嘢先同政府立場有關？咁777以後同不同界別閉門見面，唔理佢講乜、答應做乜，又或唔答應做乜，係咪都唔代表政府立場，可以事後唔算數？
又有政圈好事之徒話，其實777閉門見面內容先係真心話，佢根本偏幫差人、即使差人有警暴都唔想查，更加唔覺得對話有用，只想繼續鎮壓示威者。佢仲記得2016年777仲做緊政務司司長，出席新聞行政人員協會閉門交流晚宴，就好真情流露咁插佢當時嘅上司689冇朋友、性格有問題、唔聽人講，又插佢潛在選特首對手曾俊華冇乜公務員支持、唔配合佢令好多想做民生政策做唔到，似乎777一去到閉門會面就會好似食咗誠實豆沙包咁，乜都爆晒出嚟。
李八方