喺曼聯擾攘多時嘅智利球星阿歷斯山齊士去或留，似乎主帥蘇斯克查已有定奪，據報包括BBC等幾家英國傳媒報道，曼聯同意甲國際米蘭已達成協議，前者負擔山神大部份薪金下，將山神外借畀國際米蘭，而國際亦唔需要喺借用期滿後強制性正式收購山齊士。
山神可望同前魔將盧卡古一齊「拍住上」。據BBC引述，山神過檔後將會享有40萬鎊（約385萬港元）周薪嘅待遇，比起𠵱家喺紅魔所賺嘅50萬鎊少，但足以成為藍黑軍團最高薪球員。呢位智利球星去年一月由阿仙奴過檔後，各項賽事上陣45場僅入5球，俾外界恥笑紅魔近年其中一大「水貨」，而曾喺2008至11年替烏甸尼斯效力嘅佢，呢次係事隔八年後再次回歸征戰意甲。另外，曼聯鋒線唔夠人，曾經效力過嘅伊巴謙莫域就請纓，話紅魔出句聲可以返嚟。
