李尚正和「妹頭」盧頌恩早前添食再拍香港開電視節目《臥底旅行團2.0》，繼續玩盡內地cheap cheap團，創下該台開台以來最高收視4.3點（約28萬人）收看的佳績，將無綫同時段播出由麥明詩主持的《荷蘭好玩》比了下去。不過李尚正和妹頭就透露交出好成績的背後，拍攝時曾遭恐嚇。
香港開電視啟播兩年來，自家製節目少之又少，難得《臥底旅行團》成為經典可以無限loop，新一輯由元祖級的「阿正」李尚正和妹頭做臥底主持，二人早前接受本報專訪，阿正爆拍攝時遇到驚險事：「遇過一啲近似黑社會式嘅壓迫銷售手法，好似賣珠寶，又試過俾人兇我，喺鏡頭後叫我『小心啲呀』但我明白咁影係唔好，始終我哋冇經過人同意去拍嘢，但我哋都會驚。」
《臥底旅行團2.0》收視創下香港開電視歷來最高，相比無綫同時段播出由麥明詩和馮盈盈主持的《荷蘭好玩》在8月11日的跨平台總收視的8.6點（約56萬人），絕對有交代。如今開電視只剩下五位合約藝人，阿正和妹頭都是由有線年代開始，阿正當年更因為表現生鬼而被星爺周星馳賞識，他說：「我嗰陣得23、24歲，梗係受寵若驚啦，去到星輝（星爺公司）原來唔係拍戲，係幫手度劇本。」
難忘拍《美人魚》
阿正續說：「我以前喺大學讀到year 3，因為懶又唔識諗冇讀落去，去咗有線做暑期工。以前娛樂新聞台啲報道稿全部自己寫，仲同林海峰先生一齊做過節目，佢（星爺）覺得我好另類，所以搵我。」他又指星爺不會在片場大鬧，更憶述當年拍《美人魚》拿着一幅美人魚圖畫的鏡頭，足足拍了逾十個小時，他笑說：「換埋衫都唔會知自己做乜，佢（星爺）就係要到時先慢慢爆，正常拍十幾個take已經唔想拍，但周生就係有辦法去鞭策你。」
撰文：嵐山
攝影：沈健程