只要有錢，在香港建立自家護膚品牌不難，但要經營一個天然且強調追求身心靈健康的品牌，卻絕非單單用錢便可以成事。徐天佑太太Olive Wong在2014年創立天然護膚品牌I Never Use Foundation（INUF）Breakfast Club，在壓力都市中打造充滿大自然及藝術感的店舖，設置靜心房間及推崇環保的產品包裝，經營風格我行我素，她更把美容當作藝術看待：「Beauty is art！ 」
採訪：楊慧珊
撰文：黃嘉琪
攝影：周樂恒
場地提供：I Never Use Foundation Breakfast Club
成為INUF老闆娘之前，Olive Wong經營一間藝術顧問公司，機緣巧合下把興趣變成自己的事業，她說：「當時簽咗單project，等緊個客回覆時冇嘢做，所以就開個page寫下自己有興趣嘅嘢。有好多人問我用乜粉底，我就話我唔用粉底㗎喎，啲人又問我點解皮膚咁好，所以就想分享吓自己嘅護膚心得。」從facebook專頁到開設實體店，第一件事就是為品牌改名，Olive指INUF源於自己從不用粉底，而Breakfast Club則代表志同道合的組織，十分簡單。
反傳統經營
Olive的第一間店舖投資了六位數字，她坦言：「要裝修、租舖幾十萬一定走唔甩，當時只推出十件產品都已經用晒積蓄。」問她認不認同香港創業難？Olive說：「我覺得好關乎天時地理人和，同埋自己勤唔勤力，啱唔啱個市場。有好多人都做得好成功，亦有好多人好快就冇咗，所以好難講。」經營上，她遇到最大的困難來自別人的意見，她說：「一開始會遇到多啲困難，因為身邊朋友、屋企人會講一啲意見。生意起步時，自己會冇咁有信心，呢啲聲音就會變成阻礙，令我唔敢再放膽去做。」當遇到無法解決的困難時，Olive會採取佛系做法：「我會停一停，諗一諗，可能將個困難先放低，適當嘅時候佢要返嚟就返嚟，我會相信timing嘅重要性。」
雖然媽媽也是從事美容生意，但Olive從不尋求幫助，也不願隨波逐流，她說：「我係一個幾自我嘅人，意見會聽，但通常唔會跟。我做嘅嘢同傳統方式好唔同，例如個Spa，邊有人會咁貴租整個咁大間meditation room？其他人做facial一定係將啲房整到細細間不停做客，但我哋每日最多只做六個客人，又唔sell包裝，所以好多人都覺得我哋同傳統美容好唔一樣。」事實上，品牌包裝傾向支持環保，採用循還再造紙和玻璃。
女性要自主
Olive形容自己很自主，也是一位現代女性：「我覺得我自己係一個強又得，腍又得嘅人，而我覺得現代女性係要有自由意志，有一個前瞻性思想，可以處理到自己生活、情緒等所有嘢就係女強人。」被問到怎樣看待很多人稱呼她做徐天佑太太？她笑着回答：「咁我係呀，哈哈！」她指老公天佑其實是品牌INUF的代言人，問她會否將老公或家人當做白老鼠試新產品？她說：「梗係會啦！」並指老公皮膚好並非天生，是靠後天勤力護膚。
修讀視覺藝術的Olive，更想將美容帶到藝術的層面：「我覺得beauty同art係同一件事嚟，啲人上到嚟都唔覺得係一般賣skincare嘅舖頭，因為我有放自己嘅設計或藝術意念喺店舖同產品，所以beauty同art呢兩樣嘢喺我個business度係融合到。」
INUF不時舉辦紓緩身心靈的工作坊，Olive說：「有個台灣朋友負責整水晶手鏈，佢經常過嚟幫我哋啲客做workshop，嚟緊11月會搞個event，都係關於body mind spirit。」在商業世界，難免會面對競爭品牌互相抄襲的風氣，Olive有自我一套的處理方式，她說：「我有個習慣，就係從來唔會去follow其他類似我哋公司嘅page，咁我就唔會有抄襲嘅諗法，我只會做一啲自己想做嘅嘢。但我會follow外國嘅，或者直接去嗰間舖頭睇吓人哋點樣做，將一啲好嘅嘢帶落自己度。」
旅行尋找靈感
旅行，是Olive的靈感來源，她說：「好似INUF呢個品牌，其實係有次去西藏旅行，突然間有一個感召而想做嘅一件事。𠵱家我越嚟越鍾意去一啲接近大自然嘅地方，我會去農場住、嘗試種植，去明白大自然係點樣運作，我先可以去做一啲天然產品。有時啲嘢好死、好機械式，我想將我對大自然嘅認識放落去自己嘅產品。」
即使旅行入貨，Olive也親力親為：「我喺唔同國家入貨，每件產品都係我試過覺得好，再去認識嗰個owner入貨，所以人與人之間嘅連接都好重要。」除了旅行尋找靈感，人也是另一個渠道，她說：「頭一、兩年我都喺網上幫人做皮膚顧問，佢哋會影自己勁close up，話『好樣衰、唔好嚇親你』嘅相畀我，我就會從中學習每個人嘅皮膚問題，發現某一類皮膚應該用某一類產品，慢慢就綜合成好完整嘅line。」
員工感覺重要
一間公司的成功，與員工有很大關係，問Olive覺得老闆和員工的關係是怎樣才對公司最好？她笑說：「互相尊重，我嘅風格係畀好多自由度佢哋，如果我有個task畀佢哋，我唔會指定要step 1、2、3咁。另外因為我好少喺公司，所以佢哋一定要有自律性。」新店的裝修由Olive和朋友共同設計，有部份更是為了員工着想，她說：「當我要搬呢間舖時，我想要樓底好高、好開揚嘅感覺，好想同事返到公司唔係好似喺壓迫感好大嘅地方。客人當然好緊要，但我嘅同事每日都要困獸鬥係呢度，佢哋感覺先係最重要。」
面對近期香港沉重的氣氛，不少零售業大受打擊，Olive說：「可能呢個時候更加需要購物去平復返個心情，尤其係女人買啲beauty嘢就會開心啲，傷心又買，開心又買。」
更多精采時尚內容，盡在 http://add.appledaily.com。