喺最近3個星期，恒指大幅波動，但避開本地概念股的話，就談不上係跌市，業績期亦提供大量炒作機會。業績好的話，好似碧桂園服務（6098）、美團（3690）喺恒指跌500點嘅日子，股價一樣能顯著上升，但業績不符預期，就好似申洲（2313）咁績後受壓。
申洲上半年純利增長一成左右，毛利率下降1.4百分點，令人失望但未至於見到基本因素大逆轉。貿易戰之下，美國大客轉移生產地至越南，過渡期或影響毛利率，另一方面係人工同原料成本上漲嘅問題。
申洲早前公佈72億人民幣嘅寧波擴充計劃，相當於目前非流動資產嘅七成，申洲向來追求喺生產加入最新科技元素，新項目效能相信遠較舊產能高得多，若配合5G，呢個擴充計劃嘅目標產能料高於申洲現時總產能。係咪代表管理層對行業未來充滿信心？還是相信新項目遠勝同業、然後大手搶佔對手市場？取代舊經濟？相信係後者居多。新經濟股，已經唔係講緊單純網絡科技，係如何應用訊息傳輸、人工智能、大數據喺工業之上，睇準贏家買入，然後持有長遠應有成果。一次半次業績並未動搖長遠利好因素，有質素嘅股照計回吐極有個譜，長線而言，反而係吸納機會。
晉佳
http://fb.com/advanceguy1
本欄逢周一、三、五刊出