早幾日，九龍東的5G智能燈柱倒下，成了政治危機下一員新的亡魂。其後有人發現，燈柱中有藍牙接收器裝置，引起好大關注。點解大家會擔心？有IT界朋友認為，接收器可能偵測到不少路人的手機和隨身智能裝置。
雖然政府說過，燈柱的藍牙掃描，僅用於測量行車速度，同時亦會使用藍牙提供定位服務，以便向市民和遊客發送資訊。IT界朋友擔心的是，若然再加上人臉辨別以至RFID，燈柱就有足夠條件，可以掌握路人的身份了。
但事實上，喺智能燈柱之前，香港早就有人臉辨識功能搭配不同傳感器，例如藍牙或RFID的應用技術，例如香港部分主題公園、大型購物商場甚至體育活動，好似街頭馬拉松咁，早就用咗好耐。
點解要配搭不同技術？因為想數據更加準確。對於大型商場，使用監控技術，主要是員工管理，因為商場人流多而密集，若系統設計得好，由改善員工調度，到提升顧客體驗都有用，例如透過手機程式，看到不同設施同餐廳的輪候時間。用於大型主題公園，亦係同一道理。
至於大型體育活動，原意係為咗人流管理，以一場數萬名選手馬拉松計，他們在凌晨時份選擇交通工具到現場，賽事完結後如何散去。再者，中途若發生意外，例如有選手倒地，主辦單位就可以快速派人搶救。
原則上科技本是中立的，無論是多年前的BitTorrent開始，到近年的加密貨幣和ICO、人工智能人臉識別也好；科技帶來的究竟是建設還是破壞，視乎由邊個擁有和使用。過去幾年，就從來無人懷疑過私人商場和大型體育活動的監控鏡頭。說到尾，根據香港現時嘅實際情況，反正智能燈柱仍處於早期階段，我認為政府如果有心建構對話平台，最好嘅選擇，就係盡快宣佈智能燈柱已經壽終正寢。
尹思哲
linkedin.com/in/wanszezit