【本報訊】在1989年六四參加過人生首次遊行後，只間中上街的退休牧師張爸爸，過去兩個月全家總動員反送中，兒子更走在運動最前線。因為信仰問題，一直堅守和理非原則的張爸爸說：「我都擔心（兒子）有危險，但係正正如果個個都咁講，咁呢個運動就再冇人延續落去。如果個運動喺呢度停止，我哋嘅損失就更加大，之前嗰啲（努力）可能就白費，所以一定要堅持落去。」他深信只要肯堅持，一定有出路。
61歲張爸爸上周四又出動，手持自製的「同學們 家長撐你」標語，到中環參加支持中學生反修例集會。去年從任職20年的牧師崗位退休後，張爸爸即在今年暑假積極投身反送中運動，「過去呢兩個幾月，香港人經歷好多嘢，特別學生喺今次運動扮演嘅角色好重要；我作為一個家長，因為已退休，有時間一定會出嚟支持。我特別寫呢個牌，我要撐佢哋，希望佢哋（學生）收到我呢番心意啦」。
民陣過去三次舉行的過百萬人遊行，以至銀髮族、不同地區的遊行，張爸爸從未缺席；示威者被警方暴力鎮壓的畫面，令他深夜觀看新聞直播時多次傷心落淚，「第一次應該係6.12（包圍立法會），點解要向啲示威者放催淚彈？另外我諗7.21、8.11，俾黑社會斬嗰啲人、嗰啲少女俾人㩒落地、做醫護嘅俾人打爆咗隻眼，其實每一幕，我諗冇一晚係好瞓過」。
父子檔元朗避催淚彈
張爸爸育有一對子女，16歲兒子屬全副裝備上陣的運動前線成員，他坦言擔心兒子有危險，但一直支持他的行動，「我試過元朗嗰次陪佢哋去，嗰日我帶咗支行山杖，我話行山啫，但我個心係諗如果發生啲乜嘢，我一定要企喺佢哋前面保護佢」。最終他和兒子在警方發射催淚彈時，被困商場一段時間後始平安離開。
傳統父母一般不鼓勵子女上街抗爭，對於擔心子女上街的家長有何心聲分享，張爸爸說：「多啲了解年輕人啦，多啲進入佢哋嘅世界，唔好先批評，唔好先話佢哋『好做唔做，點解要做呢啲嘢』咁樣。呢個（行動）其實係好有意思、好有意義，其實係我哋嘅年輕人，代替本應我哋去做、去爭取嘅嘢，不過我哋冇做。如今佢哋出嚟做，所以唔好去批評佢哋，嘗試進入佢哋世界，了解佢哋嘅諗法吖。」
■記者林俊謙