阮民安（Tommy）近日多次參與反送中運動，噚日凌晨佢喺fb撰文《我很窮，我愛人民幣，但我更愛香港》，指一開始時有人揶揄佢參與運動係博翻身，又有人寸佢「冇嘢輸」，佢都冇反駁，直到日前忽然有一班網民喺佢老婆Eva嘅微博攻擊佢哋支持港獨，佢決定回應。
養活一家唔難
Tommy話自從2012年開始就做Eva嘅經理人，呢七年佢哋將生意擴展到世界好多地方，Eva嘅微博有25萬粉絲，喺內地有唔少工作機會，包括為產品出post宣傳、做時裝騷等，只要佢哋繼續好好做，要養活一家四口並唔難，仲自揭喺下月14日將推出自家品牌。
Tommy話：「品牌會喺東京Laforet正式發佈，最大嘅入貨地區一定係內地，而我哋喺內地處理品牌發行嘅負責人，係一個內地最大嘅時裝公司高層（佢公司係帶頭將Undercover全國下架），我哋喺內地嘅backup其實好好！因為我上年開始做番好多幕前工作，佢已經話要幫我安排上內地嘅綜藝節目，以一個大家認為想翻身嘅我，理應乖乖收聲，甚至表態愛國！」
不過直至6月9日大遊行，Tommy見港人團結，忍唔住公開表態支持：「咁點解我要咁做？可能係蠢……但其實，係良知！香港𠵱家發生咁大件不公平不公義嘅事，要我為咗賺錢而選擇扮不見不聞，甚至跪低表態愛國，支持警察打香港人，做甚麼護旗手，對唔住，我做唔到！」
撰文：馮仁昭