【本報訊】若富力能續用位於中國廣州的燕子崗體育場作主場，首當其衝的是眾球會的職球員，他們別無選擇下需冒險過境。謝德謙與顏樂楓均表示擔心，陳肇麒（圖）就認為足總需保障球員。
香港飛馬隊長陳肇麒認為，如要北上中國廣州，要擔心的並非球員而是足總：「其實我冇得擔心，呢樣嘢應該足總擔心。我哋作為球員，球隊去比賽我哋冇得話唔去，因為係工作。足總接受咗（富力用燕子崗）就要睇吓點保障，球員始終參加你旗下比賽，足總應該承擔責任。」若富力未能使用燕子崗，將要改用小西灣運動場作主場，陳肇麒說：「我梗係想去小西灣，又唔使早一日去。其實之前都有返大陸，都冇換手機過關。其實佢（中國邊境人員）要難為你，我覺得佢唔需要任何理由，對我嚟講冇乜關係，你唔會阻止到佢做任何嘢。」
冠忠南區隊長謝德謙與理文中場顏樂楓均對北上感擔心，謝德謙說：「我都有啲擔心，上網睇到話帶部冇嘢電話又唔得，求神拜佛三月前搞掂。如果真係要check都冇辦法，想睇咪畀佢睇囉，最緊要畀我走。」他又指足總應與球會商討是否批准富力使用燕子崗：「如果多球會覺得應該將富力主場放番香港，足總應該傾傾。」顏樂楓表示：「我有啲擔心，個人身份就避免進出內地，球隊作客交番畀球會安排。」
記者：禤家民