反送中運動持續，警民不斷引起衝突，黃秋生對前日荃灣區遊行，警方拔槍指嚇市民，有市民跪地求饒時竟被警員一腳踢開，當晚高級警司余鎧均回應踢開市民係警員「自然反應」，秋生即喺社交網留言：「全副武裝腳踢背心短褲下跪市民，呢個自然反應不自然。起碼佢嘅『自然』同人類嘅自然不太相近。」秋生又轉發一段片，見一個後生仔俾警察攻擊，秋生質問：「其實你哋想點呢？繼續激化情況，令國際加深認識你哋？你哋成功咗啦。聽我外婆講日治時代，路過嘅市民係要向日軍鞠躬，唔係就打你。你哋又成功啦。」何韻詩就表示：「多謝叔叔，真英雄。當警隊已全瘋，只能靠我哋自己救自己。」
阿澤故事寸爆
杜汶澤亦喺網上講小故事：「開學了，老師問小明，啱啱做乜喺操場打同學？小明答『自然反應！』老師好嬲地問『咁曳豬？喺邊學返嚟？』小明答『警察記者會』。」對於社會撕裂情況，杜汶澤舊愛顏仟汶則明顯企另一邊，佢喺8.5三罷後，就喺網上寫：「香港唔會迎合到你哋要求㗎喇！不如你哋搵過一個，你哋覺得夠民主，夠自由嘅地方去生活啦，拜託。」相隔幾分鐘佢再寫：「唔好再講黑警白衣啦，你哋都係一樣，仲畀佢哋更甚囉。」、「總之就打，唔啱聽就打，打死佢，哈哈哈哈哈。」到噚晚有網民回應顏仟汶留言：「香港就是有民主，你嗰啲三級片先可以上映。」顏仟汶就話自己已收片酬，但唔包收視：「國內播唔播三級片唔關我事，我拍過好多電視同電影都唔係三級的，唔需要咁標籤我。」佢又責備示威者不斷打爛嘢唔啱。
撰文：馮仁昭