警察前日喺荃灣出動水炮車對付示威者，八方見成班連登仔喺網上呼籲前線小心，唔好睇小水炮，點知水炮車第一炮連冇水嘅膠水馬都射唔郁，無面之餘更令撐警藍絲失望，其中一個肯定係何君堯！
話說立法會幾個月前傾水炮車，當時民主派梁繼昌要求交代水炮車水柱衝擊力，何君堯即刻話咁個衝擊力就一定勁，仲話勁過屋企任何一個jacuzzi（按摩浴缸）！點知前日水炮車條水柱似乎冇乜力！有網民去佢fb留言，話佢之前喺立會對於水炮車嘅講法非常之精采，估唔到個水炮車真係可以沖涼用，又問何對水炮車嘅表現有咩評價？面對網民揶揄，何君堯似乎真心覺得冇癮，答咗一句：「屙尿都勁過佢！」見何君堯咁冇癮，網民即食住上踩多腳：「何律師今晚食咗誠實豆沙包？？btw幾時自首？」