在香港做時裝設計難，在外國也許有更多的機會，但也絕不是一件容易的事。《add》一連五天訪問香港時尚的不同新力量，今日第二天介紹的是香港90後新進設計師劉肇琮（Nick Lau），今年只有21歲的他，未滿20歲時就在紐約創立個人時裝品牌，之後打入巴黎時裝周搞pop-up，為港爭光，前途一片光明。
撰文：高綽盈
攝影：郭賢興
爽朗的笑容，黝黑的膚色加上帶小小口音的廣東話，這是Nick給人的第一印象，在香港土生土長，13歲到英國讀寄宿學校，之後在紐約知名設計學府Parsons School of Design畢業，19歲時創立個人同名品牌NICKLAU，你可以說他稍為贏在起跑線上，但從言談間，你可以感覺到他是個有抱負，有理想的年輕人。
兼多重身份
Nick現年21歲，年紀輕輕，不只是一個設計師，也是一個攝影師，一個媒體創作人，事實上他創立個人品牌的原因，正正與攝影有關，「15歲嗰時有次影相搵唔到啱嘅衫畀model着，令我萌起設計自家品牌嘅想法。」Nick的品牌就如其人生寫照，「我喺香港、倫敦同紐約住過，呢三個地方嘅文化都影響咗我好多，我品牌嘅concept主要來自一個中西融合嘅概念，喺兩者之中勾勒出一個平衡點，並且將運動服飾同名牌嘅設計二合為一。」兩種風格和三地文化的融合，正是NICKLAU的精髓，從設計服裝、拍攝廣告照到資金方面，他樣樣親力親為，全心全意投入到品牌中。
品牌在紐約扎根，Nick卻沒有忘記香港這個家，人生的第一場時裝騷，就是在香港舉行，「咁我喺香港做咗兩次嘅時裝騷，第一次係三年前喺一個細嘅畫廊度做，算係將品牌正式面世，向大家展示我嘅作品，將唔同嘅人、唔同嘅文化、唔同背景嘅人聚集一齊，同大家分享我嘅創意。」他的第一個系列受到紐約的影響，設計以黑白為主，剛柔並濟，非常符合現今時裝界的大趨勢，「我都好想帶返我嘅家鄉香港去紐約，推廣香港嘅設計，展示新一代香港設計師嘅創意。」
19歲奠基礎
成立個人品牌後，Nick並非正式在紐約推出或者帶品牌回香港發展，膽粗粗的他踩入巴黎時裝周搞pop-up store，「兩年前喺巴黎做過一個一星期嘅pop-up store，個idea係同一班喺倫敦、紐約嘅朋友一齊合作，我哋有好多唔同嘅idea，由音響到場地都係我哋自己設計，個pop-up store展示咗我哋下一代嘅創意，同我本身個品牌亦好夾，嗰次係我第一次參與時裝周，係一個好令人興奮嘅經驗。」當年只有19歲的他在國際踏出第一步，為品牌奠定基礎。
長時間在國外生活，Nick對香港也有種情意結，「我被呢一個大城市嘅文化影響咗好多，香港係個中西融合嘅地方，Soho就係一個幾好嘅例子，有好傳統嘅文武廟，有賣舊嘢、紀念品嘅地方，同時又有西方嘅文化，有好多唔同地方嚟嘅人，我覺得呢一個樞紐，係個好能夠激發靈感嘅地方，亦都與我多元與國際化嘅DNA息息相關。」所以Nick每次回港都會周圍探索，以新角度「重新認識」這個家，「攝影都係我一個興趣，我好鍾意喺香港周圍影吓相，或者坐係coffee shop度畫下sketches，攞吓靈感。」
集年輕創意
Nick的創意不只局限於時裝之中，他最近在紐約開設了一間叫Monochrome的創意中介公司，「我開咗一間Creative Management Agency，去代表一班有才華、相信可以為將來帶來改變嘅年輕創作者，會喺香港、倫敦同巴黎各地搞唔同嘅project。」年輕創作者之間互相支持、成長和發展，代表着下一代的他們所發揮的無窮創意，就讓我們拭目以待。
新Talent楊舜量
Nick Lau算贏在起跑線，而90後的更新力量還有他：去年剛從HKDI及Nottingham Trent University畢業的楊舜量，同年在「香港青年時裝設計家創作表演賽」（YDC）勇奪New Talent Award，雖然他還未有正式成立個人品牌，但就已經與Joyce聯手推出限量系列，踏出成功的第一步。
系列以尼采作品Ubermensch為靈感，並以MMA和運動元素為設計概念，楊舜量用上大量手帶、臂帶和拉鏈等細節，外形與功能性兼備，表達年輕人冒險和戰鬥精神。他更特意利用洗水、上蠟等技巧為的服裝營造出稍為破舊的效果，豐富布料質感，他表示：「希望先累積工作經驗，為推出個人品牌作好準備。」
貿發CENTRESTAGE
新設計師成名需要舞台，香港貿易發展局於下月4至7日舉辦的香港國際時尚匯展（CENTRESTAGE），邀請了香港設計師麥雋亭Anais Mak，以及紐約設計師Joseph Altuzarra同台發佈最新力作。另外當然少不了每年一度、提攜不少年輕設計師的「香港青年時裝設計家創作表演賽」和全球最大型可持續時裝設計比賽「Redress設計大賽等」，藉此推廣香港的時裝設計，為新生代帶來更多的機會。
更多精采時尚內容，盡在 http://add.appledaily.com。