宋熙年2007年當選成為國際中華小姐冠軍後，人生逆轉，當年在澳洲獵頭公司做Intern的她，搖身變成藝人，在無綫工作十二年，也由單身變成三口之家，2016年嫁陳智燊（Jason），去年誕下囝囝Damon。宋熙年上月步老公後塵離巢，她有信心有更好發展，主要是Jason為她開路，宋熙年深信「兩公婆一條心」，互相扶持闖每個難關。
現年34歲的宋熙年上月約滿無綫決定向外闖，她日前在中環接受《蘋果》專訪時，談到十二年來在無綫的得失，她說：「好多得着，好多人話我最大得着係『你老公』，咁都係，識到佢都好開心，呢十二年喺香港生活令我人生多姿多采。時間過得好快，回想當年冇嚟選美，冇加入TVB，我嘅生活會平淡好多，可能𠵱家喺澳洲做家庭主婦，有機會生咗三件，點都好，我對𠵱家生活好滿意。」
冇隔夜仇
陳智燊去年約滿先外闖，過去一年發展很順，為老婆宋熙年派定心丸，宋熙年直認：「舊年佢離開，我同佢講一定難唔過當年隻身嚟香港，我哋𠵱家已建立咗好多嘢，就算有乜嘢難題都會頂得到。想當年我哋初初嚟，拖住個篋，年紀細乜都冇，又唔識人，又冇經驗，𠵱家起碼有咗十二年經歷，面對外闖應該冇當年咁困難。人大咗，分析仔細咗，兩個人又可以商量，當日一離開，我都唔捨得，好彩Jason呢一年run得好順，佢畀咗好多貼士我，我亦同佢分享諗緊乜嘢，或者有乜嘢諗唔通，兩個人有商有量，件事唔順都變得順咗，我今年離開肯定係易過佢，兩公婆一條心。」
兩人算是圈中模範夫妻，宋熙年說：「我哋嘅默契係『熱烈討論』後累積番嚟，呢啲唔係拗撬，唔係嗌交，熱烈討論係好民主，大家去傾、去衡量，以屋企利益着想做決定，有時佢要就我，有時我就佢。維繫一個家庭要經常熱烈討論，我哋嘈最多話題係家頭細務，反而人生大事冇拗過。」她表示兩人即使有拗撬從不過夜：「我係唔記仇嘅人，Jason都係瞓醒覺冇事嘅人，有時大家意見不合，出去開工返嚟，件事已丟淡咗。兩個人之間，無論乜嘢拗撬，最重要係我哋依然係愛對方，大家都係為屋企着想，其他嘢乜都唔重要，唔使放咁大。」
追多個女
已有一子的宋熙年，爆料指Jason結婚時曾笑言要生四個，不過大仔去年出世後，老公已改口生三個，她說：「相信我再生第二個，佢會話生兩個。」可是她的父親恨再抱孫，不斷催促生三個，宋熙年投訴說：「佢哋男士唔知生仔有幾辛苦，湊小朋友要花好多心機同精神，我一定會生多一個，有咗囝囝，自然恨囡囡，不過一切都順其自然，最緊要BB開心健康，兩兄妹或兩兄弟，感情好就足夠。」宋熙年坦言不想囝囝被縱壞：「我生多一個，等焦點分散吓，令佢學吓關心同愛護人，再生都一、兩年內，𠵱家事業上有目標同拼搏心。」
撰文：比華利
攝影：沈健程
化妝：Sammy Lam
髮型：Nicole Yip of ii hair & nail
場地提供：Madame Fu-Grand Cafe Chinois