上次到泰國曼谷，出閘時見大批中國遊客等候落地簽證，心諗泰國使乜咁煩呀，強國人大量嚟到泰國使錢，一於免簽證（如香港特區護照），放佢哋入境，就慳番大量時間與行政費啦。
誰知8月20日有報紙報導，泰國旅遊局見到每年有過千萬中國遊客殺到，去年就有1060萬，遠遠拋離次名馬來西亞人（460萬），要求政府開放方便之門，免中國遊客簽證入境。點知本來與中國維持良好關係嘅泰國，竟然有外交部反對，理由係中國與印度遊客（去年150萬名）入到泰國後，購物幫襯鄉里自己人，中國人更從事商業活動炒起農產品價格，對國家安全及民眾有影響。睇吓啲遊客數字，印度少中國近七倍，對泰國有乜威脅呀，好可能係泰國外交部唔想畀中國鬧搞針對，故意拉埋印度人落水。
中國遊客、中國移民帶埋錢去其他國家，都不受歡迎，自己人真係要檢討吓，譬如中國移民去到加拿大入籍，居然舉起五星旗示威反對加拿大政府，就夠令人側目。美國特朗普將香港與中美貿易談判扯上關係，副總統彭斯要求中國承認中英聯合聲明有效力，中國只係透過外交發言人反駁：「說三道四，顛倒黑白，干預內政」之類。但加拿大總理杜魯多講到香港示威，中國駐加大使館竟然厲聲駁斥，一啲都唔畀面，即係明恰加拿大冇實力。既然有「強大祖國」作為後盾，唔怪得入了加拿大國籍的中國移民（包括一啲香港移民）感覺自豪，痛罵加拿大民主選舉無用，只會選出庸才治國了。一啲加拿大籍人仲離譜，好似發咗精神病，例如一位移加港人楊湛在8月20日於明報刊登一份廣告，最後一段係咁：「當前香港暴亂沒完沒了，平定香港亂局已別無選擇，市民唯一的希望是中央出手。派兵平亂是《基本法》有明文規定的，早在回歸前，鄧小平已有既定預見，設定了揮兵平亂方略。尤其暴亂內奸勾連外國，一再觸碰國家底線，似乎吃定中央顧忌出兵平亂，繼續肆無忌憚禍亂香港，乃至有意延續妖風，羞辱國家七十周年華誕。至此，出兵助力止亂制暴，縱萬分不願迫不得已，也惟祈決絕而為，救港於水火！」
哎吔吔，呢位老楊人在加拿大，享受民主自由安定生活，竟然掏腰包賣廣告，呼籲北京「止亂制暴、揮兵降妖」，要求解放軍入城，真不知是何居心，呢啲加拿大籍人真係雙重叛國，既早已背叛中國，做逃兵去咗加拿大唱加拿大國歌，依家又口出狂言，與加拿大總理對着幹，反對加拿大政府政策，直情係加奸啦。