葉文輝於90年代加入新城，2002年獲黃柏高賞識，簽約正東唱片，承韓國電影《我的野蠻女友》大收，連帶首支作品《I Believe》亦得益，幸運地經歷過有公司照顧和唱片分紅的時期。之後轉了幾間唱片公司，到後來唱片市場萎縮，歌手收入大不如前，近兩年成為自由身的啤梨說：「如果唔係我有電台份工維持生計，可能一早就轉行，點解咁多年嚟唱吓歌又停吓，好明顯就係唔太順利。」雖然沒有唱片公司投資，但他堅持自資製作新歌：「我同自己講每一首歌都當最後一次咁做，因為銀行冇乜錢，長遠唔可以再咁樣。」
性格悶阻發展
不過DJ身份卻令啤梨自覺是偏門歌手，他說：「平台上就有局限，我宣傳時都唔太想提起自己DJ身份，怕人哋會唔播我嘅歌。試過約好訪問喺友台，人到電台門外都要臨時取消，同事話其他原因，但其實我點會唔明白，亦真心體諒。」他又自認是悶蛋一名，某程度上阻礙了發展，啤梨說：「朋友都話我悶又少同人溝通，不過呢兩年我覺得自己開咗竅。」
對唔住曲詞人
下月在旺角麥花臣舉行慶祝入行20年演唱會，除了《I Believe》外，還有甚麼作品？啤梨笑言：「仲有《I Don't Believe》，以前初入行嗰幾年，我有同經理人講，點解每次出去都要唱同一首歌，明明我有新歌，當時佢同我講『其實你有一首hit歌係好幸運，有得唱一定要唱，十年後你就知道我冇講錯。』」誠如前經理人所言，啤梨稱非常感恩有這首歌，讓大家可以記起自己，不過他說：「最氣餒係每次出新歌，都覺得自己對唔住啲作曲填詞人，浪費咗佢哋嘅心血，想同佢哋講對唔住，係我做得唔夠好。」
撰文：曹家誠
攝影：陳俊強