今年五至七月份嘅失業率係2.9％，比以前連續14期維持在2.8%，高咗0.1個百分點。過往十幾次統計處公佈失業率，香港傳媒不予理會，只有經濟日報，以較顯著篇幅報導。美國每個月宣佈失業率，係財經大新聞，華爾街 𥄫到實，但香港失業率實在（以國際標準衡量）係太低，香港傳媒基本上冇興趣追蹤。
但8月20日居然有報紙將失業率擺上頭版頭條，明顯係配合唱衰香港經濟，企圖證明一連串示威行動破壞本港GDP增長，累人冇工做，打爛別人飯碗。以經濟學觀點，2.8%失業率與2.9%失業率，根本冇分別，皆是全民就業水平，使乜大驚小怪呀。當然，如果以後一反以前走勢，失業率連續上升14期，每期（兩個月）上升0.1個百分點嘅話，失業率會上升至4.3%，咁就經濟訊號進入黃燈警戒線嘞。左丁山經常以為，本港樓價好睇失業率之高低，假如失業率升至5%，銀主盤會出現，樓價必跌無疑，現在仍然唔使驚住。
要驚嘅就係北京大大聲嚇香港市民，加埋林鄭政府罷工不做事。目前情況就是如此，一般有錢人根本無信心在香港投資（實質的或金融性質的），大陸有錢流入香港，好快就去咗新加坡。左丁山上星期請私人銀行家D到IFC四季菊吃日本餐，吃得非常滿意，唔怪得香港一位名人大班F係四季菊常客。吃到甜品有大驚喜，就係京都豆腐花配以日本黑糖與紅豆，係四季菊之甜品精品，賓架D吃到為之動容，忍唔住嘆一口氣話：「去到加拿大唔知有冇呢樣甜品食呢？」左丁山反應快，即刻問：「你唔係想移民呀嘛？」賓架D話：「我唔會囉，但已有四五個手下遞咗信，會返加拿大。30幾年前，佢哋父母移民加拿大，佢哋在多倫多或溫哥華出世，大學畢業後回流香港，現在輪到佢哋話帶埋小學子女離開香港，返加拿大咯。我都好心煩。」去加拿大邊有咁好搵呀？年薪酬勞可能得香港嘅三分之一，日常生活又比較悶。賓架D講：「𠵱家好多人無信心吖嘛，唔係怕示威呀，而係怕冇咗一國兩制，樣樣由北京控制，睇見國泰換CEO及商務總監就心寒。」問賓架D係唔係好多資金流走，佢話未見有大量走資，但逢有新客（多來自大陸）開戶口，清一色要求把戶口放在新加坡，而且只要美元，不愛港幣，故此，港元存款增長緩慢，賓架D話：「香港新客差不多已經冇晒，新戶口九成九來自大陸富戶，做一次KYC、AML起碼要三個幾月，大陸客仍然願意等，其實佢哋把口話愛國，自己錢就死人都要存在新加坡，點都唔肯放在香港。」此亦人之常情啫，除非北京重申尊重及承認中英聯合聲明，否則香港人及內地人對一國兩制嘅信心一定逐漸消失。