對於繩結，令人立即聯想起的，是一些傳統的吉祥寓意，34歲本地設計師Zoe Siu就打破大家對繩結的既定形象，她的飾品品牌ZO-EE糅合不同繩結工藝，再融入各式各樣的創意、概念、物料，由頸鏈、耳環、飾物、手袋，以至巨型裝置設計，七年來織出大小的繩結，她說：「我一路設計就發現，繩結其實有無限可能性。」
撰文：陳蔚渝
攝影：郭賢興
成為繩結設計師前，Zoe Siu曾在國際品牌擔任牛仔褲設計師，但一邊工作慢慢發覺與學校所學的有很大落差，任何工作過程都是電腦化，加上之後去到印度、土耳其、斯里蘭卡等地的廠房與工人接觸時，發現某程度也是在勞役他們，「佢哋朝九晚九，工作瞓覺都喺同一個地方，令我開始思考自己工作嘅意義。」Zoe開始尋找自己真正的興趣，後來在參加一個國際時裝比賽找尋靈感時，無意翻到一本關於攀山繩結的書，從此便與繩結結下不解緣，更為自己解開了「死結」，「我發現唔需要好貴重嘅工具，就可以做到千變萬化，所以將繩結細節放喺比賽設計，雖然輸咗比賽，但贏咗一個創作經歷。」
學懂中西日式
對繩結很多人的印象，都只有傳統的中式繩結，Zoe由最初自學中式繩結，再學編織西式求生繩結，繼而留意到日本人會利用繩結編織器皿，甚至用於不同包裝之上，發現繩結其實可以有千變萬化的模樣，所以她嘗試融入不同物料，變化出令人意想不到的設計，「我唔係想做繩結達人，學識打過萬嘅繩結，而係希望利用摩登、貼近現代嘅方式嚟呈現繩結工藝，例如四、五年前曾經嘗試用3D printing將繩結放大五至十倍，用好粗嘅淨色繩，再用鮮色幼繩包裝，盡量想用唔同樣貌去呈現，大家平日通常都係見到紅色、金色繩結， 所以佢哋見到就會覺得有趣。」
Zoe又試過推出陶瓷系列，更特別花上一年時間去學習陶瓷，「我打完一個繩結之後浸泥漿，大概浸半日再燒陶瓷，就會變成繩結嘅樣，但燒嘅過程中十個可能只有三個會成功，其實喺錯誤之中都可以有新嘅創作，過程都係一種學習，遇到錯敗係咪應該堅持呢？」
闖歐洲試實力
創意世界無限大，Zoe也不想局限自己，今年計劃向家具發展，「𠵱家流行跨媒體，職業都冇一個既定，當然我可以一直做飾物設計，但自己都想學更加多嘢，想涉獵唔同類型設計，上年我做咗第一張凳，開始有人知我想做家具，所以都開始有相關嘅人士邀請我，嚟緊會同英國設計師crossover，今年BODW（Business of Design Week）同明年米蘭設計周，可能都會有一系列嘅作品。」Zoe最後分享，利用繩結走了七年的設計路實在不容易，而最難的是堅持。
巨型裝置目標
經常大膽試驗新物料，Zoe又會參加不同比賽和展覽，更為自己定下不同目標，她慢慢由細細件飾物，發展到大大件裝置，「後來我發現設計唔應該局限放喺身體上面，所以開始諗點樣將textile設計、裝置，同空間拉上關係，想做更加大型嘅設計。最初我訂咗一個目標，就係無論有冇人睇，都要做一幅嘢畀自己。」在這方面花了一年時間，Zoe把完成品放在社交平台，之後慢慢開始有客戶接觸，令她由最初的本地品牌小店，發展到為商場做裝置設計。
Zoe最近為K11商場設計了一個高達12米的巨型秘魯（奇譜）繩結裝置，「我腦海一直都想嘗試秘魯繩結，咁啱呢個概念，同佢哋嘅主題『Fashion Decode』好脗合。」繩結裝置貫穿了整個商場，利用超過四百米長的繩去完成，是Zoe設計生涯中，暫時最巨型的作品，「我搵咗一班90年代從事製衣業嘅人合作，大概用咗十日，最難係點樣將裝置分拆再重組入商場。呢個裝置同秘魯繩結有關，令大家知道秘魯人點樣用繩結工藝做記錄。」
更多精采時尚內容，盡在 http://add.appledaily.com。