多名國泰機師同機場員工被解僱，港人返大陸被扣留問話，中共打壓敢於發聲人士，令香港瀰漫一片白色恐怖，但特首林鄭月娥至今唔見有回應，淨係同班自己友匿喺禮賓府閉門造車傾乜嘢溝通「平台」，仲喺fb出個po︰「大家都累了。對話找出路，好嗎？」結果惹來大批網民留言大鬧，林鄭見到群情洶湧，噚日下午喺facebook話「感謝大家留言」，扮晒聽市民意見，點知佢出完po冇耐，警方就出水炮車，之後仲出真槍指向市民同記者，咁就叫有誠意同市民「找出路」？
Pawel Kuczynski畫作諷港府
林鄭喺個po話，知大家都係關心香港，先至會去佢facebook留言，聲稱：「正如我們想構建的對話平台一樣，無論你持甚麼立場，你留下的說話我都會看，都會感受到。」又話唔少網友批評政府今次對話又係花招、拖延時間，佢就聲稱話今次嘅平台要面向全港市民，同時提到「請恕我不能在這裏逐一回應數萬個留言」，堅稱任何建議都歡迎喺fb平台提出。
林鄭呢頭扮有誠意化解矛盾，但出完個po唔夠一粒鐘，差人就喺荃灣出水炮車，夜晚仲有警察向示威者、市民舉真槍，唔單止向天開槍，仲一腳踢開跪地求阿Sir收手嘅長者，難怪有網民在網上大鬧，呢頭叫市民和解，嗰頭出槍出腳對付市民，呢啲就係林鄭嘅「誠意」？
連登討論區仲喺fb專頁登咗插畫家Pawel Kuczynski嘅諷刺畫作，揶揄政府用催淚彈回應民意，真係同香港情況一模一樣。
李八方