公仔箱近年啲花旦唔係北上搵銀，就係結婚生仔，走吓一個走吓又一個，搞到冇乜有份量嘅花旦坐鎮，公仔箱高層惟有努力捧新一代姐仔上位，希望佢哋可以接棒。出身做主播嘅「豬豬」，近年機會都唔少，除咗做主持外亦開始拍劇，角色仲要幾重戲份，好似早排播出嘅重頭劇，豬豬幾乎集集都有份，同男主角「阿呆」有好多戲份，角色幾搶鏡，但豬豬生硬嘅演技當然有待改進。
一劇接一劇嘅豬豬，雖然有冇機會成為女一仲係未知數，但佢就似乎真係開始當正自己係一姐，聽聞之前豬豬拍劇，有啲幕後同事想佢幫手拍啲嘢，同埋做訪問，但佢以好忙做藉口諸多推搪，實質豬豬之後被目睹只係掛住玩電話，根本冇事忙。
仲有人八畀Jessie知，話豬豬試過有次拍攝上遇到啲佢覺得唔高興嘅事，已第一時間踩上藝員部投訴，部門同事話平時其實唔多藝員上門投訴，講真要篤人背脊都唔會直踩上部門講，只會同啲高層秘密投訴，引嚟唔少人竊竊私語，批評佢當正自己係一姐。講真豬豬條件係唔錯，希望佢珍惜機會，唔好因為衰擺款搞到冇運行啦！
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。