80後蕭先生與未婚妻以約645萬元買入荃灣愉景新城兩房單位，收樓驟眼看似無問題，感覺牆身地板企理乾淨毋須換，純粹來個廚廁大翻身，期望10萬元內埋單。有逾20年裝修工程監督經驗的香港樓宇檢驗學會副會長王信智（Johnny）檢驗後指出，如果想重新裝修廁所，未計坐廁水龍頭等用具，翻新牆身、防水層及瓷磚，連工包料估計1.5萬至2.5萬元。惟單位最大問題是窗台滲漏，窗台石「空晒心」、窗邊牆身「卜晒」，若不維修恐怕周邊牆身批盪及油漆持續剝落。如果業主長住，建議執好全屋窗台及窗邊，連同其他雜項，最慳都要5萬元內。
記者：陳家雄 張嘉鎣
單位實用493方呎，菱形廳，業主說客廳牆身有撻黑色，生怕廁所漏水滲入牆，Johnny用儀器測後又無異常。惟廁所認真殘舊，Johnny指假天花過低，令人有壓迫感，其實可造高8吋，廁所壞燈閃又閃，氣窗旁邊瓷磚全部空心。控制廁所的閂水掣螺絲甩掉，一碰手掣就甩。用了逾20年的廁櫃，仍見當年新樓打造廁櫃的用料，鋪置鋼架後裝置雲石。雖然洗手盆櫃內櫳沒外露，但受潮多年，鋼架生銹，木板褪色。櫃底木板發霉，板牆之間出現罅隙，容易藏蟲蝨。他建議更換廁櫃，始終受潮多年，以防惡化吽白蟻。洗手盆水塞彈曲壞，盆邊膠發霉。去水隔氣不如換件新，始終用了多年，是細菌溫床。其實業主看後也不開胃，講明翻新廁所。與廁相對的廚房，慶幸與廁所一樣沒有來去水滲漏的問題，但廚具裝置就天殘地缺，例如乾衣機及抽油煙機的出風喉及位的錯置。
換窗台面石 重做防水層
客廳及細房都有窗台，一敲窗台枱面石聽到空心，經儀器檢查，窗台周邊牆身有滲水迹象，Johnny稱：「好多時買二手樓，上手業主都會髹油，但如果係化妝，好短時間油漆就會卜出嚟，因為入水。𠵱家睇相信牆身已經儲咗水，窗邊嘅膠亦老化，建議換晒窗邊所有膠、窗台枱面石、窗台底做返防水，咁會好好多。」全屋地板及批盪沒空鼓，油漆也沒大問題。客廳冷氣機殘舊，運作正常，想慳唔換固然得，但最好找冷氣師傅檢查及維修，畢竟散熱器機殼生銹、去水喉接駁甩甩地。
Johnny估算單位至少要維修窗台，重做防水層及更換窗台面石，若需要搭棚，連工包料約1.5萬元。廁所浴室更換廁櫃、抽氣扇、瓷磚及防水層，連工包料1.5萬至2.5萬元，當中未計更換坐廁、洗手盆及水龍頭等器皿。廚房需要更換廁櫃、抽氣扇、瓷磚及防水層。廚房牆身地板沒大問題，不過爐具、抽油煙機需要安裝，連同其他雜費，估計全屋最慳翻新費約5萬元內。