關楚耀說，今年是他的轉捩點，「今年對我自己嚟講好重要。」
有幾重要？因為他最近和邵氏簽下經理人合約，未來計劃向電影界發展，至於唱歌，作為歌手出身的他，還是會繼續唱下去，只是大家都知道，現在單靠唱歌一瓣，根本難以在娛樂圈賺錢。
要生存，就要有機會。難得現在大樹好遮蔭，當然要好好珍惜，因為等待時機的慘況，關楚耀十年前曾經身歷其境。十年一夢，如今香港正處大難關，「我相信呢段時間，全香港各行各業都艱辛嘅，真係要等待。」
大環境如此艱難，做人做事都要等一等，諗一諗，關楚耀說：「等待嘅時間點都要做好自己先，ready好一有機會嚟就去！」
尤其對父親近年生意失利，身為長子要負起養家重擔的關楚耀來說，更加是機不可失，只因時間不等人。
撰文：文嘉龍
攝影：沈健程
見到陳柏宇攞獎最心悒
去年一齣《特技人》，劇中飾演電影導演的關楚耀，成功憑劇集入屋，最近更簽約邵氏旗下，準備向電影界進發。他說演戲也是一種減壓的發洩。
「發展想多方面啲，自己係歌手出身，喺樂壇嘅時間都12年喇。上年拍咗一套《特技人》，真係第一次喺電視劇方面發展，慢慢發覺呢幾年鍾意咗做演員、鍾意咗演戲，可以跳離關楚耀嘅身份，入咗角色感受唔同嘅嘢，對我嚟講都係一種relax、一種減壓，可以脫離咗現實嘅關楚耀。」唱歌和拍電影雙線進行，關楚耀說都要睇準時機，「𠵱家嘅環境真係要等一等，可能真係要等一個好啲嘅時機，出劇集也好出歌也好。我都係啱啱簽咗新公司，有好多嘢都要同事之間磨合，唔好急，喺呢段等待嘅時間做好自己先，ready好晒，一有機會嚟就去。」
轉公司再出發，關楚耀唔怕忙，最怕冇工開。「唔諗咁多㗎喇，最緊要就係忙到甩轆……對我嚟講，我入咗行都十二、三年，今年應該係我一個幾特別嘅轉捩點，今年對我自己嚟講好重要。」
2006年出道的關楚耀，由當年橫掃多個頒獎禮的新人獎，變成近年只能夠在台下坐足全場的人，自然有無限感慨，「我都有同我一啲同輩同期嘅歌手傾偈，譬如陳柏宇（Jason），同期歌手裏面，我同佢係最friend。開心嘅，睇到佢呢幾年嘅進步，慢慢咁由喺九展開騷，一步一步，再到紅館開騷再到𠵱家，睇到佢嗰種努力、嗰種改變囉，對我自己都係一種鼓勵，係有少少心酸嘅，話晒同期出道，見到佢咁成功，當然戥佢開心，但係自己要諗喇，自己要點樣努力，可以做到當年我哋仲係小朋友嘅時候，話一齊要開到紅館呀，當然Jason佢𠵱家已經可以開到紅館喇，我自己仍然係有一個夢想，追緊呢一個夢！」
今年初在商台的《叱咤》頒獎禮，坐在台下的關楚耀感受至深，「記得今年2019年1月1號，我去咗《叱咤》頒獎禮，因為都有好幾年冇去過頒獎禮，之前嗰幾年都係focus拍嘢，又喺外地拍過一啲網劇，跟住又拍劇集，呢幾年係少咗好多歌曲。今年自己同公司講，話一定要重新出發，特別係喺音樂方面，咁就參加咗個頒獎典禮，咁就見到Jason上晒台攞獎，即係嗰個心情係……嗰個moment係最悒嘅，但係upset完之後，冇咁多時間畀我去鑽牛角尖去唔開心，反而呢一個心酸係一個動力，畀我繼續去行我想行嘅路囉！」
諗過返加拿大避開
人生有幾多個十年？回帶十年前，09年關楚耀與衛詩在日本涉藏毒被捕，關楚耀羈押三十多天後獲釋返港，隨即舉行道歉記招，正穩步發展的歌唱事業受重創。
「當年自己嘅過失，令到我睇到好多嘢啦當然，特別係屋企人，屋企人同我經歷咗嗰件事之後，大家團結咗好多，特別係我媽咪，嗰件事令到佢病咗，即係有情緒病，要去睇心理醫生，反而令到我同佢𠵱家嗰個關係更加close。當然有得就必有失，我喺呢件事睇到太多嘢，最感恩係屋企人仍然係會支持自己。」
身邊朋友一度疏遠，「有啲朋友可能以前大家都好friend，因為某啲事情可能就會冷淡咗，但係唔緊要嘅，嗰啲朋友起碼等我知道、等我認清楚囉，但係有一班朋友仍然係好關心自己，特別係有好多記者朋友，到咗𠵱家大家都會約吓食飯聯絡吓，嗰陣時自己最低潮嘅時候，反而係嗰班記者朋友會send message畀我，話支持我，叫我加油呀，呢樣嘢就真係睇得出囉，睇得到好多人喺身邊係好錫我、好照顧我。」
最低潮時期，在加拿大出世的關楚耀，曾經想過遠走楓葉國，一走了之算數。「最低潮嘅時候真係有諗過不如逃避啦，逃避成件事，嗰時真係有諗過返加拿大避開啦，但係諗諗吓其實冇意思㗎喎，你避得幾多箒？倒不如繼續行落去，堅持落去，反而我覺得堅持落去先係最難。可能我選擇離開，周邊嘅人都會話好吖，重新過生活啦，但係過咗十年喇，自己都仲堅持緊，可能仲會得到身邊嘅人respect囉！」
錦上添花易得，雪中送炭難求。關楚耀說，當時正苦等機會之時，難得有人肯找他拍電影，那個人就是錢國偉。「當年有個導演搵我拍戲，嗰時自己係處於比較低潮嘅時候，我都有問佢，點解你會搵我拍戲呢？佢淨係講咗一句，就係話演員係需要有故事嘅，同埋佢睇到我嗰種堅持，佢話你發生呢啲事情，你可以拍吓籮柚就走啦，但係佢話我嗰種堅持令到佢respect，所以佢畀咗個機會我去嘗試。」
接了《喜愛夜蒲》當上男主角，「拍《喜愛夜蒲》之前我都有接過吓啲電影，但都係客串嘅角色，我估唔到佢（錢國偉）會搵我去做其中一個男主角，所以真係要好多謝佢。」難得機會來了，更加不應放棄，「之後都冇再諗過放棄喇，你行得出呢步，冇得返轉頭，行落去囉！」
賺錢養家係好現實
關楚耀說入行多年，段段時期都令他覺得搵食艱難，「段段都難喎，當然呢段時間係難嘅，我相信唔係淨係我覺得難啦，我相信全香港各行各業都艱辛，真係要等囉呢段時間，要等待，即係好似啲豹，嗰啲豹要捕食嘅時候都要慢慢有一個等待嘅時間。」
搵食艱難，對關楚耀而言，這幾年更加是緊急關頭，事關他要孭起養家的責任。「都係呢一、兩年啦，𠵱家呢個moment算係最嚴重，我屋企嗰個問題嚟講，惟有盡力做囉，因為始終我係大仔，真係要養屋企要照顧屋企。啱啱出道嘅時候，爹哋嘅生意都尚算可以，呢方面嘅壓力就冇咁大，但係到咗呢一、兩年，真係要去諗方法點樣去做好自己，要去賺錢養屋企，呢個係好現實嘅問題。」
關楚耀說，父親近年轉型往內地搞演唱會，可惜生意失利。「我爸爸呢幾年係轉型，轉咗去搞演唱會搞騷，但係你知有時搞騷未必百分百guarantee（保證），可能有啲失利，佢又唔係做開生意，比較難啲啦，我比較明白佢苦況，始終可能佢做監製，但係佢嗰個年代嘅嘢，或者音樂未必係呢個年代可以接受到，呢方面佢未必做得到，咁佢都要轉行囉，但係轉咗型之後，做生意又未必有其他人咁熟行，係有少少失利，係蝕咗啲錢，所以冇辦法，都要行，都要生活落去。」
撐起成頭家，關楚耀每一刻都諗搵錢時機，希望拍戲唱歌以外都可以再搞生意開源，「辛苦唔係淨係我一個，我相信大家都辛苦，屋企人又辛苦，又唔想畀咁大壓力我，但係我作為長子，自己啃咗去囉，男仔嚟㗎嘛，冇嘢嘅！有呢啲壓力就令到我喺工作上更加推動自己，令到我有更加多諗法，去搵啲新突破，𠵱家演藝事業之外，都會諗吓搞一啲生意。」
寧願忙死都好過閒死，經歷低谷時期的等運到，關楚耀知道機會可遇不可求，「等待最痛苦都係自己最低潮嗰個時間，等咗年幾，但係嗰段等待嘅時間，做好自己先，嗰年幾我真係作咗好多歌，當年公司睇到我呢個決心，就決定再畀多次機會我，慢慢到𠵱家喇，所以我覺得不能再墨守成規，主動出擊先至有機會。」
【後記】契爺
大家都知道關楚耀的背景，他父親關維麟是唱片界老行尊，曾是寶麗金唱片亞太區總裁，亦是譚詠麟、鄧麗君的唱片監製；關楚耀的二伯父是泰迪羅賓，自細出入關家作客的明星，是徐小鳳、張學友等巨星。
關楚耀說近年事業上的發展決定，父母都會尊重他的主意，「屋企人都冇乜點樣干預，當然自己有一啲重要決定，例如簽公司轉公司，都會同屋企人傾一傾……呢幾年自己做嘅嘢，起碼爹哋媽咪唔會擔心自己先，呢個係最緊要嘅大前提，唔好再擔心個仔。」
說到契爺譚詠麟，因為撐警搞出大風波，關楚耀說：「我都有keep住text佢，又唔係話佢有啲乜事件之後嘅，咁我都知佢呢一排其實都忙於佢嘅演唱會，啱啱先喺肇慶開完騷，又喺台灣踢完明星足球隊，所以都知道佢嘅近況係點樣嘅！」
契仔咁有心，不是九唔搭八的！
場地提供：FUMI