80後情侶愛情長跑11年，決定拉埋天窗，去年底見中美貿易戰令本港樓市短暫下跌，即刻出動睇樓，原本睇中葵涌葵芳閣一個415方呎單位，叫價500萬元，以為再跌無買，殊不知局勢改變，業主反價550萬元。未婚妻擔心追不到價，曾作最壞打算買元朗偏僻村屋，甚至放棄置業，與家人同住。碰巧睇到荃灣愉景新城一個兩房單位，男友蕭先生話：「呢度呎價講緊1.3萬元……其他嗰啲呎價已升到覺得唔抵……」單位叫價645萬元，由於樓價超出600萬元需付四成首期，超出預算，最終親人資助，成功建立愛巢。
追不上樓價升幅
從事會計的蕭先生和女友大學畢業後開聯名戶口，蕭先生笑着舉手說：「係我提出！我哋唔想一年去幾次旅行，嗰刻好開心，但之後好辛苦」，一起將收入約六成儲蓄，由當初兩人合共每月儲1萬至1.5萬元，後來隨住加人工，每月儲蓄增至逾3萬元，逾八年儲約140萬元。
蕭先生稱，去年計劃結婚，碰巧樓價受中美貿易戰影響而下跌，打算買樓上車，家人住荃灣，原預算約500萬元的單位，儲蓄夠支付首期連雜費，看了葵涌葵芳閣一個兩房戶，「去年12月叫價500萬元，今年2月已叫到550萬元，但500萬嗰陣無買，因為嗰時仲貿易戰，諗住經濟應該會差，樓價會再平啲。點知貿易戰一無事，樓價開始飆。」單位原本叫價550萬元，業主反價至570萬元，「覺得個價唔抵，本身葵芳閣都好舊，隔籬幢公屋仲新過佢。」準蕭太說：「其實好驚，最初睇葵芳閣叫價400萬尾，只是一、兩個月就升咗幾十萬，好黐線！即係一個月升30萬。跟住封盤，好失望，好驚買唔到，因為當時講緊一個月升幾十萬……最壞嘅打算係同屋企人一齊住，又有諗過好似同事咁，住元朗好偏僻嘅村屋，升價唔會升太多，跌又唔會跌太低，但真係好遠，夜晚11點後又無車咁樣，佢300零萬，到𠵱家都是升咗幾十萬。」
最終蕭先生不考慮偏僻村屋，今年2月睇愉景新城一個兩房單位，實用493方呎，惟叫價645萬元，「睇過荃錦中心、青衣翠怡花園，最初諗住500萬，但嗰啲已經一級一級升上去，嗰啲30年樓齡，呢度（愉景新城）約20年，除返呎價1.3萬，相對抵啲。其實呢個單位最初叫價620萬元，市況開始好，升到645萬。」
他坦言這口價超出預算，因為逾600萬元的住宅物業按揭成數最多借六成，首期不足惟有做「父幹族」，「我哋儲咗140萬元，就搵屋企人幫手，幫到就幫，幫唔到就搵返600萬元以下，可能遠少少屯門區。」鏡頭背後的蕭爸爸一臉慈祥，最終他幫兒支付多出兩成首期，他就對記者說可以幫兒子一炮過買入單位，但兒子不願意。