如果以下這位長者，是你老豆，同住一屋，你會如何過日子？
探子回報，在街茶餐廳吃通粉，聽到一個六十歲左右老人家，好大聲跟隔籬枱兩個阿伯聊天：「我覺得醫院呢單嘢，差佬肯定係俾人裝個局啦！咁橋，又影到，又打人。同埋打咗兩個月，先嚟公佈。仲有呀，佢個仔，做咩要戴口罩，無做虧心事，使乜戴口罩。」然後，重複又重複了十幾二十分鐘，樂此不疲。
好在公道也自在老人心，無分年紀。鄰座兩位長者，沒有跟他搭訕，其中一名更大有恥與為伍的氣概，越坐越開，似有蜚蠊爬進他的飯菜。如果我在現場，怕會當堂把肚裏的通粉噴成洗衣粉霧，清場！
但如果他就是你老豆，一家人像大台聚集一起吃飯一邊看非大台新聞報導，他一邊大發議論，你既不能像城壇主持人請他發言謹慎，又不能慢動作低調移開碗筷座椅以示割席，難道剩下跟他起壇議事論事一途？須知與這類長者辯論就是吵架，萬一他九唔搭八上身，話你不孝有三，唔撐警為大，唔通你跪地唱國歌認錯？
從這阿伯知D唔知D，而且對國家屈人手法似甚熟悉，以至於以當權者之腹度蟻民之心，做仔嘅跟他玩fact check，說受害者個仔在記者會上，終於憤然脫下口罩。這名老豆應該會吆喝道：「依家大陸好先進，有人臉辨識，戴口罩都多餘，梗係除咗去扮光明正大啦。」
好彩唔係我，如果係我，有些人永遠不必奢望可以互相說服，唯有避談政治避談社會一切，跟他說今日碟鹹魚好鹹，食鹽多過食米對身體沒好處。
如果堅毅到還不想放棄治療，根據談判專家策略，先假裝同意對方某部分觀點，然後婉轉指出藏在魔鬼細節中最妖魔處，例如：「係啊，都有可能㗎，個老母憎個衰佬飲醉酒，er…兩個衰仔又唔鍾意警察話示威者係曱甴，er…er…咪夾埋個老豆，犧牲小我，er…專登趁有警察在場時，比警察更眉精眼企，er…er…知道隔籬病房裝有閉路電視，又咁橋從警察眼神看到有虐待狂傾向，ererer…於是輾轉反側，引誘警察上下其手，闔家復仇屈警察囉。那個衰仔個老豆同你都係差唔多六十幾，比着你，譬如你好憎示威者，你都會咁精心策劃一次行動啦，嗱，屈人嫖妓就最方便啦。你話係咪。」
嘩，真係兜得好辛苦，老豆如果聽不出弦外之音，唯有收聲。
親人尤其是父母，最易受所謂情緒勒索，最後只能建議看看《被討厭的勇氣》第一章：「所有煩惱都來自於人際關係」。