周四嘅歐霸附首回合，愛斯賓奴主場對烏克蘭球隊索爾亞，雖然喺上半場先失一球，但中國球王武磊下半場頭槌攻門中楣，之後又交出助攻，幫球隊喺下半場攻入三球，最終以3:1反勝對手。
愛斯賓奴今場雖然攻勢唔少，但就先喺38分鐘失守，半場落後一球。換邊後，武磊喺51分鐘頭槌攻門但中楣唔入，錯失為愛奴扳平嘅機會，不過球隊七分鐘後就靠法古度費雷拉入波追平。武磊其後越踢越勇，先喺76分鐘博到12碼，雖然格尼路操刀被撲出，不過三分鐘後愛奴都靠查維亞盧比斯破網反超前。兩分鐘後，武磊助攻馬迪亞斯華加斯入波，最終球隊反勝索爾亞3:1。
同日另一場，英超嘅狼隊作客以3:2贏咗拖連奴，先下一城之餘仲拎住三球作客入球喺手，晉級形勢大好。