過去幾個星期，最多人落的廣告一定係聲明廣告（Announcement ad）。以前，聲明廣告在報章廣告佔有量少之又少，一般都係用作訃文、保險公司的銷售排名榜、公司產品出問題要道歉回收，又或者偶然見到邊個同邊個割席斷絕生意關係、邊個向邊個發表的愛的宣言等等。
最近翻開報紙，見到一版一版的公開信，由「一個人」、「一班人」、「一個團體」、「一個機構」到「一堆機構」，都紛紛出來發聲表達訴求或表明立埸。這段期間，聲明廣告，變得很重要。
平時做廣告，係由Marketing部門全權負責，有時出街前給老闆最後過目審批就是。然而這些聲明廣告，絕大部份皆由老闆親自監督兼落手落腳。有些大公司，老闆咁多個，叫得CXO嘅隨時都有十個八個，再加埋董事局之類最高持份者，由執筆、簽署、批核正式出街，過程遠比想像中複雜。
何解要咁大陣仗？正因為公開信中每粒字如非諗過度過、翻來覆去也未必能找到最適合。意思要到位而又不過火，想說的要說出來講清楚但又不可以過多和太誇，言詞太中立又兩邊不是人，篇文太短只見重點口號又怕太硬淨欠缺感情，太長又怕隱藏了重點、睇完唔知你想點……你話這些信有幾難寫！
寫信，當然要有對象。公開信，即係寫給全世界睇。所謂全世界，當然也有心目中指定的有心人啦。所以，信中內容更需要字字珠璣，準確到肉，以令收信讀信的人滿意和認同。然而，今時今日的有心人相當兩極化，想要食晒兩家茶禮，的確難上加難。礙於商業考慮，如果封信真的令至某一陣營失望和憤怒，唯有借用其他技巧、在寫信以外的層面去照顧和取悅他們。所以，我們讀信時，也要留意一下，收信的人是不是自己，免卻看罷才發覺：唔好意思，「拆咗」你封信。
文迪晞
mailto:[email protected]