今次反送中抗爭，港人團結齊心抗惡法，不單令西方各國政府領袖為港人發聲，連以往係香港問題唔多大聲嘅英國，好多國會議員都硬起來轟北京，引嚟中國外交部以嘴炮還擊。但日前英媒爆料話，貴為全國政協副主席嘅梁振英近日去信警告聲援香港嘅英國議員收聲，否則將面對後果，原本呢啲係大顯國威嘅事，但最離奇係689噚日強烈否認有寫過呢啲信，仲要連外交部都出埋嚟否認，究竟當中搞乜呢？
「駭人聽聞的流氓信」
根據《每日郵報》報道，呢封署名「CY Leung」嘅信，要求英國政府「緩減可激起香港示威騷亂的虛假聲明，立即停止那自由派議程（liberal agenda）將有利將來中英關係」，又話如果英國議員繼續搞煽動，「中國政府會更詳細闡釋將來的後果」，又強調英國對香港事務無話事權。《每日郵報》報道形容外國對英國國會議員咁直接恐嚇真係前所未見，有收到信嘅無黨派上議院議員奧爾敦（David Alton）直情話係「駭人聽聞的流氓信」，自己做咗40年議員都未收過類似信件。
不過689噚日強烈否認有寫過呢啲信，八方亦透過前特首辦，向689查詢呢件事，689回覆話「正在查究」係咪有人冒認佢嘅身份發信，又斷言冇向英國國會議員發出電郵、短信或以其他方式表達類似信件內容，而外交部發言人耿爽都出聲，話成件事係子虛烏有。
咁究竟件事真相係點？八方噚晚去David Alton嘅fb，佢完全冇刪除有關呢封信報道嘅貼文，即係佢唔認為有問題，但689又死話冇寫過，咁大家會信David Alton，定信689呢？
李八方