日前特首林鄭月娥話要構建對話平台，不過呢個平台都未落成，就已經率先有人說不。國際關係學者沈旭暉（圖）喺證實咗林鄭個對話平台會喺嚟緊周末開會，因為佢收到政府邀請，但係佢婉拒咗，仲提出五個理由佢要說不，淨係第一個理由已經鏗鏘有力。佢話政府能夠即時答應民間五大訴求，根本毋須溝通平台。
除咗第一個理由，佢話公眾關注嘅真普選、2047問題、中港融合問題，理論上可以喺平台傾，不過平台係有紅線，好似有人提出港獨、自決就唔傾得，甚至成為日後被政治審查嘅罪證，咁點傾？
「都唔會搵梁天琦傾」
再者北京、港府都將𠵱家情況講成係「香港資本主義的經濟問題」，咁喺平台傾完嘅嘢可能成為新一份施政報告嘅內容，變相認受緊施政報告，加上咁樣去解決目前問題係隔靴搔癢，傾嚟做乜？
沈又話家陣民間同政府冇互信，去得個平台都係親北京、親政府，而佢哋嘅建議都係「以強硬、整肅為主旋律」，如果政府聽咗佢哋講，咁會令其他參與平台嘅其他人唔安心。最後沈旭暉自嘲話，政府都唔會搵坐緊監嘅梁天琦出嚟傾，如果得番好似佢呢啲no stake嘅人都係冇公信力。