【社會專題】
反送中運動爆發以來三度有逾百萬人上街促撤惡法，但政府坐視不理、警方加強鎮壓，令衝突戰線蔓延。18區幾乎區區中彈、人人「食煙」，連平日不問政事的街坊也難忍警員濫暴，終「爆煲」站出來發出怒吼。黃大仙逾百街坊本月初率先「踢拖」出陣，在零裝備下力抗警員濫捕市民，以身擋警車又或是以蒸魚碟撲熄催淚彈；深水埗更三度成為示威戰場，大批連口罩也沒有的街坊穿着背心短褲上陣，在街頭巷尾鬧爆警員亂放催淚彈。「黃藍是政見，黑白是良知」，不少街坊不問政見參與這場「拖鞋革命」，只求為港人取回公道兩字。
記者：林穎嵐 林熊 徐雲庭
婆婆中催淚煙手腳腫脹 「政府請我食毒藥」
深水埗先後多次爆發發警民衝突，警方在區內街道狂放催淚彈，單是8.14晚深水埗警署一帶，即施放35枚催淚彈及一枚橡膠子彈。在區內擺地攤維生的70多歲陳婆婆，無辜吸入催淚煙致手腳腫脹，痛風惡化，至今仍覺皮膚痕癢：「你做政府唔可以請我食毒藥！」她憶述當晚吸入催淚煙後慌忙逃走，雙眼被濃煙熏至無法睜開，沿途更被警員怒吼驅趕，慨嘆「依家啲警察變晒」。
鎮壓嚴重過六七暴動
事隔至今逾一星期，陳婆婆受訪時仍驚魂未定，擔心擺檔時再被警員突襲，「驚俾啲人亂扑亂打！」她強調最怕被警察打和中催淚彈，近日更將多年前購買的口罩隨身攜帶，惟恐警察再「做嘢」濫暴。
70歲多歲的陳婆婆雖有三名子女，但各有家庭負擔，她多年來自食其力，在深水埗賣二手物品維生；她憶述8.14晚上9時許，有年輕示威者提醒她趕快收檔，指警方會清場，「嗰時我又冇口罩又冇眼（罩），收咗檔我啲嘢都未冚好，結果俾人偷咗兩袋嘢」。陳婆婆指離開時雙眼矇矓，雙腳又因風濕腫痛，走路困難，當時她隨人群沿福華街疏散，曾向在場警員表明「想坐港鐵返屋企」，但對方卻多次向她指罵及驅趕，「落到去港鐵站已經好大煙，睇唔到（嘢）幾乎仆死，好在有個細路扶住我走落下層咋」。
「惡囉！直情好似唔係我哋以前嗰班香港警察！𠵱家啲警察變晒！」曾經歷六七暴動的陳婆婆，形容警方現時使用暴力肆無忌憚，武力鎮壓程度比六七暴動更甚，「以前放催淚彈係喺地下碌，但係𠵱家直向人群射！」
經歷8.14深水埗事件，陳婆婆既心疼年輕人被打，又為林鄭月娥「成日匿埋唔解決問題」而憤怒，「我唔識咩政治……係覺得好難過，香港好好哋搞成咁，係佢一手搞成咁！連我哋全部人都要受禍」。
陳婆婆認為示威者訴求並不過份，難明特首為何不回應，「淨係要求你取消（撤回）兩個字啫……點解要講壽終正寢呢？我唔明呀！人死咗就壽終正寢，法例唔會壽終正寢嘛！」她認為林鄭常指摘示威者禍港，只是將責任諉過於人，「個禍係你闖出嚟，咁應該係你去收拾，唔係由班細路收拾！佢哋係為我哋好，唔係為我哋而賤，佢哋好辛苦呀」。